काठमाडौं । जल तथा मौसम विज्ञान विभागले बुधबार देशका गोरखा, चितवनसहित ४० जिल्लाका नदी तथा खोलामा आकस्मिक बाढीको जोखिम रहेको भन्दै उच्च सतर्कता अपनाउन सर्वसाधारणलाई आग्रह गरेको छ। मनसुन सक्रिय रहँदा देशका विभिन्न क्षेत्रमा भारीदेखि धेरै भारी वर्षा हुने सम्भावना रहेकाले नदी तथा खोलाको बहाव अचानक बढ्न सक्ने विभागले जनाएको हो।
विभागका अनुसार कोशी, बागमती, गण्डकी र लुम्बिनी प्रदेशका हिमाली, पहाडी तथा तराईका केही स्थानमा बुधबार रातिसम्म भारीदेखि धेरै भारी वर्षा हुन सक्ने पूर्वानुमान गरिएको छ। यसका कारण ती क्षेत्रमा बहने नदी, खोला तथा खोल्सीहरूमा आकस्मिक बाढी आउने जोखिम उच्च रहेको छ।
बाढीको जोखिम रहेका जिल्लामा ताप्लेजुङ, पाँचथर, तेह्रथुम, संखुवासभा, सोलुखुम्बु, दोलखा, रामेछाप, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, मकवानपुर, नुवाकोट, धादिङ, रसुवा, गोरखा, चितवन, नवलपरासी (पूर्व), नवलपरासी (पश्चिम), रुपन्देही, कपिलवस्तु, तनहुँ, पाल्पा, स्याङ्जा, लमजुङ, कास्की, पर्वत, म्याग्दी र बागलुङ रहेका छन्।
त्यसैगरी रुकुम पूर्व, रुकुम पश्चिम, जाजरकोट, जुम्ला, बझाङ, दार्चुला, बैतडी, डोटी, डडेलधुरा र कञ्चनपुर तथा आसपासका जिल्लाका स–साना नदी र खोलाहरूमा पनि बहाव उल्लेख्य रूपमा बढ्न सक्ने र आकस्मिक बाढीको मध्यम जोखिम रहेको विभागले जनाएको छ।
विभागले नदी किनार, तटीय बस्ती, डुबान हुने क्षेत्र तथा पहिरोको जोखिम भएका स्थानका बासिन्दालाई विशेष सतर्क रहन आग्रह गरेको छ। साथै, वर्षाका कारण सडक अवरुद्ध हुन सक्ने, पुल तथा कल्भर्टमाथि पानीको बहाव बढ्न सक्ने र पहाडी क्षेत्रमा पहिरो जान सक्ने भएकाले यात्रा गर्दा विशेष सावधानी अपनाउन अनुरोध गरिएको छ।
विपद् व्यवस्थापनका निकायहरूले स्थानीय प्रशासन, सुरक्षाकर्मी र सम्बन्धित निकायबाट जारी हुने सूचना तथा निर्देशन पालना गर्न, अनावश्यक रूपमा नदी तथा खोलाको आसपास नजान र सम्भावित जोखिमबाट जोगिन आवश्यक पूर्वतयारी गर्न सर्वसाधारणलाई आग्रह गरेका छन्। लगातारको वर्षासँगै मनसुनजन्य विपद्को जोखिम बढेकाले आगामी केही दिन उच्च सतर्कता अपनाउन मौसमविद्हरूले सुझाव दिएका छन्।
