काठमाडौं । नियमित सुरक्षा गस्तीका क्रममा नेपाल प्रहरीले सिन्धुलीको कमलामाई नगरपालिका–९ भीमानबाट खैरो हेरोइनजस्तो देखिने पदार्थ र नियन्त्रित लागूऔषध ट्रामाडोलसहित पाँच जनालाई पक्राउ गरेको छ। पक्राउ परेकामाथि लागूऔषध कारोबारमा संलग्न रहेको आशंकामा थप अनुसन्धान भइरहेको प्रहरीले जनाएको छ।
केन्द्रीय प्रहरी समाचारकक्षका अनुसार महोत्तरीबाट काठमाडौंतर्फ आउँदै गरेको मधेस प्रदेश ०५–००१ ज ००८६ नम्बरको हायसमा सवार सिराहाको मिर्चैया नगरपालिका–५ निवासी २० वर्षीय सन्देश यादवको साथबाट खैरो हेरोइनजस्तो देखिने पदार्थ ४५ ग्राम १९० मिलिग्राम बरामद गरिएको हो।
यस घटनामा संलग्न रहेको आरोपमा बा.प्र.०२–०४६ प ४८५३ नम्बरको मोटरसाइकलमा सवार धनुषाको कमला नगरपालिका–७ निवासी २० वर्षीय राहुलकुमार मण्डल र सिराहाको कल्याणपुर नगरपालिका–६ निवासी २० वर्षीय अभिषेककुमार साहलाई पनि प्रहरीले नियन्त्रणमा लिएको छ।
त्यसैगरी, मोरङबाट काठमाडौंतर्फ आउँदै गरेको बा.प्र.०१–००६ ख ३७१२ नम्बरको हायसमा सवार सुनसरीको धरान उपमहानगरपालिका–६ निवासी ३० वर्षीय विकास दाहाल र इटहरी उपमहानगरपालिका–१७ निवासी २४ वर्षीय सागर कार्कीलाई पनि पक्राउ गरिएको प्रहरीले जनाएको छ।
उनीहरूको साथबाट खैरो हेरोइनजस्तो देखिने पदार्थ ८२० मिलिग्राम तथा नियन्त्रित लागूऔषध ट्रामाडोल १ हजार ४३० ट्याब्लेट बरामद गरिएको छ।
प्रहरीले बरामद लागूऔषध, सवारी साधन तथा पक्राउ परेका पाँचै जनालाई नियन्त्रणमा लिई लागूऔषध सम्बन्धी कसुरअन्तर्गत थप अनुसन्धान अघि बढाएको जनाएको छ। पछिल्लो समय राजमार्ग प्रयोग गरेर लागूऔषध ओसारपसार गर्ने गतिविधि बढ्दै गएको भन्दै प्रहरीले नियमित निगरानी र चेकजाँचलाई थप कडा बनाएको जनाएको छ।
