काठमाडौं । नेपाल फार्मेसी परिषद्को अध्यक्षमा डा. कादिर आलम नियुक्त भएका छन्। नवनियुक्त अध्यक्ष आलमले बुधबार स्वास्थ्य तथा खाद्य स्वच्छतामन्त्री निशा मेहताको उपस्थितिमा पद तथा गोपनीयताको शपथ ग्रहण गरेका हुन्।
स्वास्थ्य तथा खाद्य स्वच्छतामन्त्रीको स्वकीय सचिवालयका अनुसार परिषद्को अध्यक्ष पदका लागि आवेदन दिएका उम्मेदवारहरूमध्ये छनोट प्रक्रियामार्फत डा. आलमलाई अध्यक्षमा नियुक्त गरिएको हो।
शपथग्रहण समारोहपछि मन्त्री मेहताले नवनियुक्त अध्यक्ष आलमलाई परिषद्को कामलाई थप प्रभावकारी, पारदर्शी र उत्तरदायी बनाउन निर्देशन दिइन्। उनले औषधि सेवा प्रणालीलाई व्यवस्थित गर्ने, फार्मेसी शिक्षाको गुणस्तर अभिवृद्धि गर्ने, पेसागत नियमनलाई सुदृढ बनाउने तथा जनविश्वास बढाउने दिशामा सक्रिय रूपमा काम गर्न आग्रह गरिन्।
मन्त्री मेहताले स्वास्थ्य क्षेत्रमा फार्मेसी सेवाको भूमिका महत्वपूर्ण रहेको उल्लेख गर्दै परिषद्ले औषधिको सुरक्षित प्रयोग, दक्ष जनशक्ति उत्पादन, पेसागत आचारसंहिता कार्यान्वयन तथा सेवाको गुणस्तर सुधारमा प्रभावकारी भूमिका खेल्नुपर्ने बताइन्।
नवनियुक्त अध्यक्ष डा. आलमले परिषद्को संस्थागत क्षमता सुदृढ गर्दै फार्मेसी क्षेत्रको विकास, सेवाको गुणस्तर सुधार तथा नियामक भूमिकालाई अझ प्रभावकारी बनाउने प्रतिबद्धता व्यक्त गरेका छन्।
नेपाल फार्मेसी परिषद्ले फार्मेसी शिक्षा, फार्मासिस्ट तथा फार्मेसी व्यवसायीहरूको दर्ता, नवीकरण, पेसागत मापदण्ड निर्धारण र नियमन गर्ने प्रमुख जिम्मेवारी निर्वाह गर्दै आएको छ। नयाँ नेतृत्वसँगै परिषद्ले औषधि सेवा र फार्मेसी क्षेत्रको सुधारमा थप प्रभावकारी भूमिका खेल्ने अपेक्षा गरिएको छ।
