काठमाडौं । लगातारको वर्षासँगै देशका विभिन्न भागमा बाढीको जोखिम बढेको छ। बाढी पूर्वानुमान महाशाखाले मंगलबार देशका ३० जिल्लामा आकस्मिक बाढीको मध्यम जोखिम रहेको भन्दै नागरिकलाई उच्च सतर्कता अपनाउन आग्रह गरेको छ।
महाशाखाका अनुसार मंगलबार ताप्लेजुङ, इलाम, झापा, धनकुटा, भोजपुर, मोरङ, सुनसरी, संखुवासभा, सोलुखुम्बु, उदयपुर, दोलखा, सिन्धुपाल्चोक, काभ्रेपलाञ्चोक, काठमाडौं, भक्तपुर, ललितपुर, नुवाकोट, लमजुङ, कास्की, म्याग्दी, बागलुङ, बाँके, जाजरकोट, रुकुम पूर्व, रुकुम पश्चिम, सुर्खेत, दार्चुला, बैतडी, अछाम र डोटी लगायत आसपासका जिल्लाबाट बग्ने साना तथा मझौला नदीहरूमा पानीको बहाव उल्लेख्य रूपमा बढ्न सक्ने पूर्वानुमान गरिएको छ।
यी क्षेत्रमा आकस्मिक बाढी आउन सक्ने मध्यम जोखिम रहेको जनाउँदै महाशाखाले नदी तथा खोलानाला आसपास बसोबास गर्ने, यात्रा गर्ने तथा नदी तर्ने नागरिकलाई विशेष सावधानी अपनाउन आग्रह गरेको छ।
त्यसैगरी, सप्तकोसी, तमोर, दूधकोसी, तामाकोसी, नारायणी, त्रिशूली, मर्स्याङ्दी, सेती, भेरी, महाकाली र कन्काई लगायतका प्रमुख नदीहरूमा पनि पानीको बहाव उल्लेख्य रूपमा बढ्ने सम्भावना रहेको महाशाखाले जनाएको छ।
सम्बन्धित निकायले स्थानीय तह, सुरक्षा निकाय तथा विपद् व्यवस्थापनसँग समन्वय गरी सम्भावित जोखिम क्षेत्रका बासिन्दालाई आवश्यक सतर्कता अपनाउन अनुरोध गरेको छ। वर्षायामका कारण नदी किनार, तटीय क्षेत्र, होचा पुल र बाढी प्रभावित स्थानमा अनावश्यक आवतजावत नगर्न तथा मौसम र बाढीसम्बन्धी आधिकारिक सूचना नियमित रूपमा पालना गर्न पनि आग्रह गरिएको छ।
