गण्डकी । जिल्ला प्रहरी कार्यालय कास्कीले विभिन्न मुद्दामा अदालतबाट दोषी ठहर भई फरार रहेका छ जना प्रतिवादीलाई पक्राउ गरेको छ।
जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक वीरेन्द्रकुमार पासवानका अनुसार पक्राउ परेकामध्ये चोरीसम्बन्धी कसुरमा तीन जना, चेक अनादर, बैंकिङ कसुर र अभद्र व्यवहार सम्बन्धी मुद्दामा एक/एक जना रहेका छन्।
पक्राउ परेका सबै प्रतिवादीलाई कैद सजाय कार्यान्वयन तथा जरिवाना असुलउपरका लागि सम्बन्धित अदालतमा पेस गरिएको प्रहरीले जनाएको छ।
प्रहरीका अनुसार पक्राउ परेका प्रतिवादीबाट रु १३ लाख ७ हजार ७२० जरिवाना रकम असुलउपर हुने भएको छ।
जिल्ला प्रहरी कार्यालय कास्कीले अदालतबाट दोषी ठहर भई फरार रहेका प्रतिवादीलाई पक्राउ गर्ने अभियानलाई निरन्तर तीव्रता दिँदै आएको जनाएको छ। प्रहरीका अनुसार गत महिना मात्रै विभिन्न मुद्दाका ६६ जना फरार प्रतिवादी पक्राउ परेका थिए।
प्रहरीले अदालतको फैसला कार्यान्वयनलाई प्रभावकारी बनाउन फरार प्रतिवादीको खोजी तथा पक्राउ अभियानलाई आगामी दिनमा पनि निरन्तरता दिइने जनाएको छ।
