काठमाडौं । संघीय संसद अन्तर्गत प्रतिनिधि सभाको बैठक आज (मंगलबार) दिउँसो १ बजे सिंहदरबारस्थित संसद भवनमा बस्ने भएको छ। संसद सचिवालयले सार्वजनिक गरेको कार्यसूचीअनुसार बैठकमा सरकार तथा सांसदका तर्फबाट महत्वपूर्ण विषयहरू प्रस्तुत हुँदैछन्।
बैठकमा प्रधानमन्त्री बालेन्द्र शाहको तर्फबाट कानून, न्याय तथा संसदीय मामिलामन्त्री सोविता गौतमले आदिवासी जनजाति आयोगको आर्थिक वर्ष २०८१/८२ को छैटौँ वार्षिक प्रतिवेदन प्रतिनिधि सभामा पेश गर्ने कार्यक्रम रहेको छ। उक्त प्रतिवेदनमार्फत आदिवासी तथा जनजाति समुदायको अवस्था, अधिकार संरक्षण, सरकारी नीतिको कार्यान्वयन तथा आगामी सुधारका विषयमा संसदलाई जानकारी गराइने अपेक्षा गरिएको छ।
त्यसैगरी बैठकको मुख्य आकर्षणका रूपमा नेपाली कांग्रेसका संसदीय दलका नेता भीष्मराज आङ्देम्बेले दर्ता गराएको जरुरी सार्वजनिक महत्वको प्रस्तावमाथि छलफल हुने कार्यसूची रहेको संसद सचिवालयले जनाएको छ।
नेता आङ्देम्बेले प्रस्तुत गर्न लागेको प्रस्तावमा देशभर रहेका वास्तविक भूमिहीन, सुकुम्बासी तथा अव्यवस्थित बसोबासीहरूको पहिचान गरी उनीहरूको संरक्षण, सुरक्षित आवास तथा स्थायी पुनःस्थापनाको सुनिश्चितता गर्न सरकारलाई आवश्यक व्यवस्था गर्नुपर्ने उल्लेख गरिएको छ।
प्रस्तावमा भूमिहीन तथा सुकुम्बासी नागरिकलाई सुरक्षित आवास, आधारभूत सेवा, खाद्य, स्वास्थ्य, शिक्षा र जीविकोपार्जनको निरन्तरताको व्यवस्था मिलाउनुपर्ने, विस्थापन गर्नुपरे उचित क्षतिपूर्ति र स्थायी पुनःस्थापनाको प्रत्याभूति गरिनुपर्ने तथा वास्तविक भूमिहीन एवं सुकुम्बासीलाई तत्काल लालपूर्जा वितरण गर्नुपर्ने माग गरिएको छ।
उक्त प्रस्तावलाई सांसद ऐनबहादुर महर, युवराज दुलाल र आरेन राई ले समर्थन गर्ने कार्यसूची रहेको छ। प्रस्तावमाथि सत्तापक्ष र प्रतिपक्षका सांसदहरूले धारणा राख्ने तथा सरकारले आवश्यक जवाफ दिने सम्भावना रहेको छ।
भूमिहीन, सुकुम्बासी तथा अव्यवस्थित बसोबासीको समस्या लामो समयदेखि समाधान हुन नसकेको विषय भएकाले यस प्रस्तावमाथिको छलफललाई संसदको महत्वपूर्ण एजेन्डाका रूपमा हेरिएको छ। साथै, आदिवासी जनजाति आयोगको वार्षिक प्रतिवेदन पेश हुने कार्यक्रमले पनि आदिवासी तथा जनजाति समुदायसँग सम्बन्धित नीति, अधिकार र विकासका विषयमा संसदमा थप बहस हुने अपेक्षा गरिएको छ।
