काठमाडौं । सुनसरीको देवानगञ्ज गाउँपालिका–३ अन्तर्गत पर्ने कप्तानगञ्ज क्षेत्रमा जारी कर्फ्यु आदेशको अवज्ञा गर्दै प्रदर्शनकारीले उग्र प्रदर्शन, आगजनी तथा तोडफोड गरेपछि नेपाली सेना परिचालन गरिएको छ। स्थानीय प्रशासनले सुरक्षा अवस्था थप जटिल बन्दै गएपछि हतियारसहित नेपाली सेनाको टोली परिचालन गरेको हो।
जिल्ला प्रशासन कार्यालयले जारी गरेको कर्फ्यु आदेशको बेवास्ता गर्दै ठूलो संख्यामा प्रदर्शनकारी सडकमा उत्रिएका थिए। प्रदर्शनका क्रममा केही स्थानमा आगजनी, सार्वजनिक तथा निजी सम्पत्तिमा तोडफोड र सुरक्षाकर्मीमाथि ढुंगामुढा प्रहार भएको जनाइएको छ। त्यसपछि नेपाल प्रहरी, सशस्त्र प्रहरी बलसँगै नेपाली सेनालाई समेत परिचालन गरिएको हो।
स्थानीय प्रशासनका अनुसार सेनाको टोली घटनास्थलमा पुगेपछि सुरक्षा व्यवस्था थप कडा बनाइएको छ। संवेदनशील क्षेत्रमा सुरक्षाकर्मीको गस्ती बढाइएको छ भने भीड नियन्त्रणका लागि आवश्यक सुरक्षा रणनीति अपनाइएको छ। हाल कप्तानगञ्ज क्षेत्रको अवस्था क्रमशः नियन्त्रणमा आउन थालेको प्रशासनले जनाएको छ।
सुनसरी प्रहरीका प्रवक्ता डीएसपी चन्द्र खड्काले सुरक्षा निकायले संयमित रूपमा स्थिति नियन्त्रणमा ल्याउने प्रयास गरिरहेको जानकारी दिए। उनका अनुसार स्थानीय बासिन्दाको सुरक्षा सुनिश्चित गर्दै थप अप्रिय घटना हुन नदिन आवश्यक सबै सुरक्षा व्यवस्था मिलाइएको छ। उनले नागरिकलाई कर्फ्यु आदेशको पूर्ण पालना गर्न र अफवाहमा विश्वास नगर्न आग्रह गरेका छन्।
यसअघि आइतबार राति कप्तानगञ्जमा दुई समूहबीच भएको झडप नियन्त्रण गर्ने क्रममा सुरक्षाकर्मीले गोली चलाउँदा देवानगञ्ज गाउँपालिका–३ का २४ वर्षीय ओमप्रकाश मेहताको मृत्यु भएको थियो। घटनापछि स्थानीयवासी आक्रोशित बनेका थिए र त्यसको विरोधमा प्रदर्शन चर्किएको हो।
गोली लागेर नौ जना सर्वसाधारण घाइते भएका छन्। घाइतेमध्ये एक जनाको अवस्था गम्भीर रहेको जनाइएको छ भने अन्य घाइतेहरूको विभिन्न स्वास्थ्य संस्थामा उपचार भइरहेको छ। घाइतेहरूको स्वास्थ्य अवस्थाबारे थप विवरण आउन बाँकी रहेको प्रहरीले जनाएको छ।
घटनापछि जिल्लाको सुरक्षा अवस्था उच्च सतर्कतामा राखिएको छ। सम्भावित थप हिंसा रोक्न अतिरिक्त सुरक्षाकर्मी परिचालन गरिएको छ भने प्रशासनले नागरिकलाई शान्त रहन, कानुनको पालना गर्न र कुनै पनि भ्रामक सूचना नफैलाउन अनुरोध गरेको छ।
प्रशासनले घटनाको विस्तृत अनुसन्धान सुरु गरेको जनाएको छ। गोली चलाउनुपर्ने अवस्था कसरी सिर्जना भयो, झडपको वास्तविक कारण के थियो र हिंसात्मक गतिविधिमा संलग्न व्यक्तिहरूको पहिचान गरी कानुनी कारबाही अघि बढाइने बताइएको छ।
स्थानीय बासिन्दाले भने घटनाको निष्पक्ष छानबिन, दोषीमाथि कारबाही तथा मृतकका परिवारलाई न्याय दिलाउन माग गरेका छन्। सुरक्षा निकाय र प्रशासनले स्थिति पूर्ण रूपमा सामान्य नहुँदासम्म उच्च सतर्कता कायम रहने जनाएको छ।
