काठमाडौं । प्रजातान्त्रिक पार्टी नेपालले संवैधानिक राजसंस्था, वैदिक सनातन हिन्दु राष्ट्र, स्वायत्त शासन प्रणाली र भ्रष्टाचारमुक्त शासन व्यवस्थाको माग गर्दै भदौको अन्तिम सातादेखि सडक आन्दोलनमा उत्रिने तयारी गरेको छ ।
आइतबार राजधानीमा बसेको पार्टीको कार्यसम्पादन समितिको बैठकले आन्दोलनको तयारी गर्ने निर्णय गरेको हो । पार्टी अध्यक्ष डा. तारानाथ लुइँटेलले केन्द्रीय समितिको बैठकबाट आन्दोलनको औपचारिक निर्णय गरिने जानकारी दिए ।
उनका अनुसार बैठकमा संवैधानिक राजसंस्था, वैदिक सनातन हिन्दु राष्ट्र, स्वायत्त शासन प्रणाली र भ्रष्टाचार नियन्त्रणका विषयमा विस्तृत छलफल भएको थियो ।
‘कार्यसम्पादन समितिको बैठकमा संवैधानिक राजसंस्था, वैदिक सनातन हिन्दु राष्ट्र, भ्रष्टाचारमुक्त नेपाल र स्वायत्त शासन प्रणाली स्थापना गर्ने विषयमा छलफल गरेका छौं । यही एजेण्डालाई लिएर केन्द्रीय समितिको बैठकबाट भदौको अन्तिम सातादेखि सडक आन्दोलनमा जाने निर्णय गर्नेछौं,’ अध्यक्ष लुइँटेलले भने ।
उनले नेपाली कांग्रेस, नेकपा (एमाले), नेकपा (माओवादी केन्द्र) तथा काठमाडौं महानगरपालिकाका प्रमुख बालेन्द्र साह (बालेन) माथि विदेशी स्वार्थअनुसार काम गरिरहेको आरोप लगाए ।
‘नेपाली कांग्रेस, एमाले, नेकपा र जेन–जी आन्दोलनबाट आएका बालेनजीहरूले विदेशीले बोकाइदिएको भारी बोकेका हुन् । विदेशी प्रभावका कारण अहिलेको अवस्था सिर्जना भएको हो,’ उनले दाबी गरे ।
अध्यक्ष लुइँटेलले भ्रष्टाचारविरुद्ध भइरहेको कारबाही प्रभावकारी हुन नसकेको पनि टिप्पणी गरे ।
‘भ्रष्टाचारीलाई समात्ने, थुन्ने अनि फेरि छोड्ने प्रवृत्तिले मुलुक अगाडि बढ्न सक्दैन । यसलाई रोक्नुपर्छ भन्ने प्रजातान्त्रिक पार्टी नेपालको स्पष्ट धारणा हो,’ उनले भने ।
उनले भ्रष्टाचार नियन्त्रण, संवैधानिक राजसंस्था, वैदिक सनातन हिन्दु राष्ट्र तथा धार्मिक स्वतन्त्रतासहित सर्वधर्म समभावको एजेण्डा लिएर वर्षा सकिनेबित्तिकै पार्टी सडक आन्दोलनमा उत्रिने बताए ।
