काठमाडौं । कपिलवस्तुमा शनिबार राति भएको सवारी दुर्घटनामा मोटरसाइकलमा सवार दुई जनाको ज्यान गएको छ। दुर्घटना शुद्धोधन गाउँपालिका–६, बिपिया क्षेत्रमा भएको जिल्ला प्रहरी कार्यालय कपिलवस्तुले जनाएको छ।
प्रहरीका अनुसार नेपालगञ्जबाट काठमाडौंतर्फ आउँदै गरेको भे १ ख ४५५२ नम्बरको बसले विपरीत दिशाबाट आउँदै गरेको लुम्बिनी प्रदेश ०१–००४ प ३८५६ नम्बरको मोटरसाइकललाई ठक्कर दिएको थियो। ठक्करपछि मोटरसाइकलमा सवार दुवै जनाको घटनास्थलमै मृत्यु भएको प्रहरीले जनाएको छ।
दुर्घटनामा मृत्यु भएका दुवै व्यक्तिको सनाखत हुन बाँकी रहेको जिल्ला प्रहरी कार्यालय कपिलवस्तुले जनाएको छ। शवलाई आवश्यक कानुनी प्रक्रिया पूरा गरी पहिचानका लागि राखिएको र आफन्तको खोजी भइरहेको प्रहरीले जानकारी दिएको छ।
घटनापछि प्रहरी टोली तत्काल घटनास्थलमा पुगेर उद्धार तथा अनुसन्धानको काम अघि बढाएको थियो। दुर्घटनामा संलग्न बस र त्यसका चालकलाई प्रहरीले नियन्त्रणमा लिई थप अनुसन्धान सुरु गरेको जनाएको छ।
प्रहरीले दुर्घटनाको वास्तविक कारण खुल्न बाँकी रहेको बताउँदै सवारीको गति, सडकको अवस्था तथा अन्य सम्भावित पक्षबारे अनुसन्धान भइरहेको जनाएको छ। दुर्घटनासम्बन्धी थप विवरण अनुसन्धानपछि सार्वजनिक गरिने प्रहरीको भनाइ छ।
