काठमाडौं । महाकाली नदीमा पानीको बहाव घटेपछि नेपाल–भारत जोड्ने पश्चिमी नाका अन्तर्गत शारदा ब्यारेज (बनबासा पुल) बाट चारपाङ्ग्रे सवारीसाधनको आवागमन पुनः सञ्चालनमा आएको छ।
महाकाली नदीमा पानीको बहाव एक लाख क्युसेक नाघेपछि सुरक्षाका कारण बनबासा पुलमा चारपाङ्ग्रे सवारीसाधनको आवागमन अस्थायी रूपमा रोकिएको थियो। जिल्ला प्रहरी कार्यालय कञ्चनपुरका अनुसार मंगलबार राति नदीको बहाव घटेर ८६ हजार क्युसेकमा पुगेपछि सवारी सञ्चालन पुनः खुला गरिएको हो।
यसअघि मंगलबार दिउँसो नदीको बहाव एक लाख २४ हजार क्युसेकसम्म पुगेको थियो। जलस्तर उच्च भएपछि पुलको सुरक्षालाई ध्यानमा राख्दै चारपाङ्ग्रे सवारीसाधनलाई रोक लगाइएको थियो भने मोटरसाइकल र पैदल यात्रुलाई भने बिहानैदेखि आवागमन गर्न अनुमति दिइएको थियो।
महाकाली नदीको जलस्तर घटेसँगै अहिले बनबासा पुलबाट सवारी आवागमन सामान्य अवस्थामा फर्किएको प्रहरीले जनाएको छ। यसले पश्चिमी नाकाबाट हुने यात्रु तथा मालवाहक सवारीको आवागमन सहज भएको छ।
भारतीय पक्षले एक सय वर्षभन्दा पुरानो शारदा ब्यारेज (बनबासा पुल) जीर्ण अवस्थामा रहेको भन्दै बाढीका बेला संरचनामा जोखिम बढ्न सक्ने कारण देखाएर लामो समयदेखि उच्च बहावको समयमा चारपाङ्ग्रे सवारी सञ्चालन नगर्न आग्रह गर्दै आएको छ।
प्रशासनले भने मनसुन सक्रिय रहेकाले महाकाली नदीको जलस्तर फेरि बढ्न सक्ने सम्भावना रहेको भन्दै नदी आसपासका बासिन्दा तथा यात्रुलाई मौसम र नदीको अवस्थाबारे जारी हुने आधिकारिक सूचनाको पालना गर्न आग्रह गरेको छ।
