काठमाडौं । पोखराका अग्रज पत्रकार तथा समाजसेवी केशवराज पराजुलीको ९२ वर्षको उमेरमा निधन भएको छ । पोखरा महानगरपालिका–३ नदीपुरस्थित आफ्नै निवासमा गएराति निधन भएका पराजुलीको आज सेती नदी किनार तुलसीघाटमा अन्त्येष्टि गरिएको हो ।
दीर्घ समयदेखि पत्रकारिता क्षेत्रमा सक्रिय रहँदै आएका पराजुली नेपाली पत्रकारिताका पुराना पुस्ताका सम्मानित व्यक्तित्वका रूपमा चिनिन्थे । विसं २०४० सालदेखि प्रकाशन सुरु भएको ‘जनमत दैनिक’ का उनी संस्थापक सम्पादक थिए । उनले पोखरामा पत्रकारिताको विकास र विस्तारमा महत्वपूर्ण भूमिका निर्वाह गरेका थिए ।
पराजुलीले पत्रकारितासँगै शिक्षा, सामाजिक सेवा तथा साहित्यिक क्षेत्रमा समेत योगदान पुर्याएका थिए । विभिन्न पत्रपत्रिकामा उनका खोजमूलक लेख, विचार तथा अनुसन्धानात्मक सामग्रीहरू प्रकाशित भएका छन् । साथै उनका केही कृतिहरू पनि प्रकाशित छन् ।
पोखराको पत्रकारिता क्षेत्रलाई व्यवस्थित बनाउन, नयाँ पुस्ताका पत्रकारलाई प्रेरणा दिन तथा सामाजिक चेतना अभिवृद्धिमा पराजुलीको योगदान उल्लेखनीय रहेको सहकर्मीहरूले बताएका छन् । उनको निधनले पोखरासहित समग्र नेपाली पत्रकारिता क्षेत्रमा ठूलो क्षति पुगेको बताइएको छ ।
पराजुलीका एक छोरा र चार छोरी छन् । उनको अन्त्येष्टिमा परिवारजन, पत्रकार, शुभेच्छुक तथा स्थानीयको सहभागिता रहेको थियो ।
यसैबीच, नेपाल पत्रकार महासङ्घ कास्की शाखाले विज्ञप्ति जारी गर्दै पराजुलीको निधनप्रति गहिरो दुःख व्यक्त गरेको छ । महासङ्घले पत्रकारिता क्षेत्रमा उनले पुर्याएको योगदानको स्मरण गर्दै शोकसन्तप्त परिवारप्रति समवेदना प्रकट गरेको छ ।
