काठमाडाैं । फिफा विश्वकप फुटबलमा फ्रान्स र नर्वे अन्तिम १६ मा पुगेका छन् ।
बुधबार बिहान भएको खेलमा फ्रान्सले स्विडेनलाई ३-० गोलले पराजित गरेकाे हाे । फ्रान्सले स्विडेनमाथि सहज जित निकाल्दै अन्तिम १६ मा स्थान बनाएको छ । फ्रान्सको जितमा किलियन एमबाप्पेले दुई तथा ब्राडली बार्कोलाले एक गोल गरेका थिए । एमबाप्पेले ४५औँ र ७४औँ मिनेटमा तथा ब्राडली बार्कोलाले खेलको ५३औँ मिनेटमा गोल गरेका हुन् ।
साथै यसअघि मंगलबार राति भएको खेलमा नर्वेले आइभरी कोस्टलाई २–१ गाेलले पराजित गरेको हो । नर्वेको जितमा एर्लिङ हालान्ड र नुसाले गोल गरेका थिए । खेल सकिन चार मिनेट बाँकी रहँदा हालान्डले प्याट्रिक बर्गको पासलाई गोलमा परिणत गर्दै नर्वेलाई जित दिलाएका हुन्।
यसअघि खेलको ३९औँ मिनेटमा एन्टोनियो नुसाले नर्वेलाई अग्रता दिलाएका थिए । तर ७४औँ मिनेटमा अमाद डियालोले बराबरी गोल फर्काएपछि खेल रोमाञ्चक बनेको थियो । हालान्डले प्रतियोगितामा तीन खेलमा पाँच गोल गरेका छन् । अब नर्वेले अन्तिम १६ मा ब्राजिलसँग प्रतिस्पर्धा गर्ने भएकाे छ ।
यस वर्षको विश्वकपमा एम्बाप्पेको गोल संख्या ६ पुगेको छ । एमबाप्पेले यो विश्वकपमा सर्वाधिक गोल गर्ने अर्जेन्टिनाका मेसीसँग बराबरी गरेका हुन् । विश्वकपमा कूल १८ गोलसहित उनी मेस्सी भन्दा एक गोलले मात्र पछाडि छन् ।
अब फ्रान्सले अन्तिम १६ मा पाराग्वेसँग प्रतिस्पर्धा गर्ने भएकाे हाे । विश्वकपमा अहिले बिहान पौने ८ बजेदेखि मेक्सिको र इक्वेडरबीच प्रतिस्पर्धा जारी रहेकाे छ।
