काठमाडौँ । काठमाडौँ महानगरपालिका वडा नं. १७ स्थित धोविचौरमा सामूहिक ‘कुमारी पूजा’ सम्पन्न भएको छ । नेवार समुदायको मौलिक संस्कृति र धार्मिक परम्पराको संरक्षण गर्ने उद्देश्यले आयोजना गरिएको उक्त कार्यक्रममा ठूलो संख्यामा बालबालिकाको सहभागिता रहेको थियो ।
वडा कार्यालयको आयोजना तथा स्थानीय के.के. महिला समूहको समन्वयमा सम्पन्न कार्यक्रममा १८८ जना बालबालिका सहभागी भएका थिए । सहभागी बालबालिकालाई परम्परागत विधिअनुसार कुमार र कुमारीका रूपमा पूजा गरिएको आयोजकले जनाएको छ ।
धार्मिक तथा सांस्कृतिक मान्यताअनुसार बालबालिकाभित्र रहेको पवित्रता, शक्ति र दैवी स्वरूपको सम्मान गर्ने उद्देश्यले कुमारी पूजा आयोजना गरिएको हो । कार्यक्रममा सहभागी बालबालिकालाई विधिपूर्वक पूजा गरी टीका, प्रसाद तथा सम्मान प्रदान गरिएको थियो ।
कार्यक्रममा स्थानीय समुदाय, अभिभावक तथा संस्कृतिप्रेमीहरूको सहभागिता रहेको थियो । अभिभावकहरूले यस्ता कार्यक्रमले नयाँ पुस्तालाई आफ्नो मौलिक संस्कृति, परम्परा र पहिचानसँग जोड्न महत्वपूर्ण भूमिका खेल्ने बताएका छन् ।
आयोजकका अनुसार पछिल्लो पुस्तामा परम्परागत संस्कार र सांस्कृतिक अभ्यासप्रति रुचि बढाउन तथा नेवार समुदायको ऐतिहासिक परम्परालाई निरन्तरता दिन यस्ता कार्यक्रमले सहयोग पुर्याउने विश्वास लिइएको छ ।
