काठमाडौं । नेपाल प्रहरीले अखिल नेपाल फुटबल सङ्घ (एन्फा)का पूर्वअध्यक्ष कर्मा छिरिङ शेर्पालाई पक्राउ गरेको छ । प्रहरीले उनलाई ठगी तथा आपराधिक विश्वासघातसम्बन्धी कसुरमा अनुसन्धानका लागि नियन्त्रणमा लिएको जनाएको छ ।
प्रहरीको केन्द्रीय अनुसन्धान ब्युरो (सिआइबी)को टोलीले शुक्रबार साँझ शेर्पालाई पक्राउ गरेको हो । सिआइबीका अनुसार उनीमाथि हात्तीगौँडामा सञ्चालन हुँदै आएको टुङ्गराम इन्टरनेशनल एकेडेमीको आर्थिक कारोबारसँग सम्बन्धित विषयमा अनुसन्धान भइरहेको छ ।
सिआइबीका प्रवक्ता प्रहरी वरिष्ठ उपरीक्षक (एसएसपी) अनुपम शमशेर जबराका अनुसार शेर्पामाथि विद्यालयको करिब ८ करोड ७८ लाख ३० हजार रुपैयाँ रकम अपचलन गरेको आरोपमा अनुसन्धान अघि बढाइएको हो ।
प्रहरीका अनुसार शेर्पाले विद्यालयको कार्यकारी प्रमुखका रूपमा काम गर्ने क्रममा विभिन्न गतिविधिमार्फत व्यक्तिगत लाभ लिएको र संस्थालाई आर्थिक तथा व्यवस्थापकीय क्षति पुर्याएको आरोप छ ।
अनुसन्धानका क्रममा शेर्पाले विद्यालयलाई अनुचित हानि पुर्याउने उद्देश्यले डर, त्रास तथा अनुचित प्रभाव प्रयोग गरी भक्तपुरको दधिकोटमा रहेको २९ रोपनी ४ आना जग्गा आफ्नो स्वामित्वमा रहेको कम्पनीको नाममा बिक्री गरेको पाइएको सिआइबीले जनाएको छ ।
प्रहरीले घटनासम्बन्धी थप प्रमाण संकलन तथा अनुसन्धान प्रक्रिया अघि बढाइरहेको जनाएको छ । आरोप पुष्टि वा खारेज हुने विषय भने अनुसन्धान र कानुनी प्रक्रियाबाट टुंगो लाग्नेछ ।
