काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनको उद्घाटन सत्रमा नेपाली कांग्रेसका सभापति गगन थापा सहभागी हुने भएका छन् ।
सभापति थापाका स्वकीय सचिव शंकर कुइँकेलका अनुसार थापा आइतबार चितवन पुगेर महाधिवेशनको समुद्घाटन समारोहमा सहभागी हुने कार्यक्रम रहेको छ ।
‘सभापतिज्यू आज चितवन जानुहुन्छ, रास्वपा महाधिवेशन समुद्घाटन समारोहमा सहभागी हुने कार्यक्रम छ,’ कुइँकेलले भने ।
रास्वपाले आफ्नो प्रथम महाधिवेशनमा विभिन्न राजनीतिक दलका शीर्ष नेताहरूलाई आमन्त्रण गरेको छ । सोहीअनुसार कांग्रेस सभापति थापा उद्घाटन सत्रमा सहभागी हुन लागेका हुन् ।
आइतबार बिहान थापाले रास्वपा र पार्टी सभापति रवि लामिछानेलाई महाधिवेशनको सफलताको शुभकामना व्यक्त गरेका थिए । उनले छोटो समयमै रास्वपाले उल्लेखनीय जनसमर्थन प्राप्त गर्दै राष्ट्रिय राजनीतिमा आफूलाई बलियो शक्तिका रूपमा स्थापित गरेको बताएका छन् ।
शुभकामना सन्देशमा थापाले लेखेका छन्, ‘तपाईंको नेतृत्वमा संगठन निर्माणदेखि निर्वाचनसम्मको यो यात्रा प्रशंसनीय छ ।’
उनले महाधिवेशनलाई विचार, संगठन र नीतिगत दृष्टिले पार्टीलाई थप परिपक्व, जिम्मेवार र दूरदर्शी बनाउने ऐतिहासिक अवसरका रूपमा समेत उल्लेख गरेका छन् ।
रास्वपा महाधिवेशन उद्घाटन समारोहमा नेकपा एमालेका नेता प्रदीप ज्ञवाली, नेकपा (माओवादी केन्द्र) का नेता वर्षमान पुन तथा राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन पनि सहभागी हुने कार्यक्रम रहेको छ ।
उता, रास्वपाका वरिष्ठ नेता बालेन शाह समेत महाधिवेशनमा सहभागी हुन चितवन प्रस्थान गरिसकेको जनाइएको छ ।
रास्वपाको प्रथम महाधिवेशनलाई पार्टीको भावी राजनीतिक दिशा, संगठनात्मक संरचना र नीतिगत प्राथमिकता तय गर्ने महत्वपूर्ण अवसरका रूपमा हेरिएको छ ।
