काठमाडौँ । नेपाली कांग्रेसका सभापति गगन थापा ले राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनको अवसरमा शुभकामना व्यक्त गर्नुभएको छ।
सभापति थापाले आइतबार सामाजिक सञ्जालमार्फत शुभकामना सन्देश जारी गर्दै रास्वपालाई सफल महाधिवेशनको शुभेच्छा व्यक्त गर्नुभएको हो। उहाँले छोटो समयमै रास्वपाले उल्लेखनीय जनसमर्थन प्राप्त गर्दै राष्ट्रिय राजनीतिमा आफूलाई प्रभावशाली राजनीतिक शक्तिका रूपमा स्थापित गर्न सफल भएको बताउनुभएको छ।
शुभकामना सन्देशमा थापाले नयाँ राजनीतिक शक्तिको उदयले लोकतान्त्रिक प्रणालीलाई थप सशक्त बनाउने विश्वास व्यक्त गर्नुभएको छ। उहाँले रास्वपाले राजनीतिक प्रतिस्पर्धालाई नयाँ ऊर्जा दिएको उल्लेख गर्दै लोकतन्त्रमा विचार, नीति र कार्यक्रममार्फत स्वस्थ प्रतिस्पर्धा आवश्यक रहेको धारणा राख्नुभएको छ।
सभापति थापाले रास्वपाका सभापति रवि लामिछाने को नेतृत्वमा पार्टीले संगठन निर्माणदेखि निर्वाचनसम्मको यात्रा सफलतापूर्वक तय गरेको भन्दै प्रशंसा गर्नुभएको छ। छोटो अवधिमै देशव्यापी संगठन विस्तार गर्दै जनताको विश्वास जित्न सफल हुनु उल्लेखनीय उपलब्धि भएको उहाँको भनाइ छ।
रास्वपाले पार्टी स्थापना भएको चार वर्षपछि पहिलोपटक राष्ट्रिय महाधिवेशन आयोजना गरेको हो। चितवनमा सुरु भएको महाधिवेशनमा देशभरबाट आएका हजारौं प्रतिनिधिको सहभागिता रहेको छ। महाधिवेशनले नयाँ नेतृत्व चयन गर्नुका साथै संगठनात्मक संरचना, विधान संशोधन तथा आगामी राजनीतिक कार्यदिशाबारे महत्वपूर्ण निर्णय गर्ने अपेक्षा गरिएको छ।
विभिन्न राजनीतिक दलका नेताहरूले पनि रास्वपाको महाधिवेशनलाई शुभकामना दिइरहेका बेला कांग्रेस सभापति थापाको सन्देशलाई राजनीतिक सहकार्य, लोकतान्त्रिक संस्कार र स्वस्थ प्रतिस्पर्धाको उदाहरणका रूपमा हेरिएको छ।
रास्वपाको प्रथम राष्ट्रिय महाधिवेशनलाई पार्टीको भविष्यको दिशा निर्धारण गर्ने महत्वपूर्ण राजनीतिक घटनाका रूपमा लिइएको छ। महाधिवेशनबाट चयन हुने नेतृत्व र पारित हुने नीतिगत निर्णयहरूले आगामी दिनमा नेपाली राजनीतिमा पार्टीको भूमिकालाई थप स्पष्ट बनाउने अपेक्षा गरिएको छ।
