काठमाडौं — सामाजिक सञ्जालमा सार्वजनिक भएको एक भिडियोपछि दाङमा युवतीमाथि कुटपिट र धम्की दिएको आरोपमा एक युवक पक्राउ परेका छन्। प्रहरीले घटनामा संलग्न रहेको आरोपमा लागुऔषधसमेत बरामद गरेको जनाएको छ।
प्रहरीका अनुसार दाङको तुलसीपुर उपमहानगरपालिका–२ भंके निवासी २४ वर्षीय रमेश ठाडा मगरले एक युवतीलाई जंगल क्षेत्रमा लगेर खुकुरी देखाउँदै डर, त्रास र दबाब सिर्जना गर्दै कुटपिट गरेको आरोप लागेको छ। उक्त घटनाको भिडियो सामाजिक सञ्जालमा सार्वजनिक भएपछि घटनाले व्यापक चासो र आलोचना पाएको थियो।
भिडियोमा देखिएको व्यवहारका आधारमा इलाका प्रहरी कार्यालय तुलसीपुरबाट खटिएको टोलीले अनुसन्धान सुरु गरेको थियो। अनुसन्धानका क्रममा प्रहरीले रमेशलाई उनकै घरबाट नियन्त्रणमा लिएको जनाएको छ। पक्राउ गर्ने क्रममा विभिन्न प्रकारका लागुऔषधजन्य ट्याब्लेटसमेत बरामद गरिएको प्रहरीको भनाइ छ।
जिल्ला प्रहरी कार्यालय दाङका प्रवक्ता डा. हेम केसीका अनुसार घटनामा संलग्न रहेको आशंकामा २१ वर्षीय जिबराज खत्रीलाई पनि नियन्त्रणमा लिएर अनुसन्धान भइरहेको छ। घटनाको प्रकृति, भिडियो सामग्री, प्रत्यक्ष–अप्रत्यक्ष संलग्नता तथा अन्य प्रमाणका आधारमा थप कानुनी प्रक्रिया अघि बढाइएको प्रहरीले जनाएको छ।
प्रहरीले प्रारम्भिक अनुसन्धानबाट पीडित युवतीको स्वास्थ्य अवस्था सामान्य रहेको जानकारी दिएको छ। यद्यपि मानसिक रूपमा परेको असर तथा घटनाको सम्पूर्ण पाटोबारे आवश्यक अनुसन्धान भइरहेको बताइएको छ।
प्रहरी स्रोतका अनुसार घटनामा संलग्न व्यक्तिविरुद्ध कुटपिट, डरधम्की, सार्वजनिक शान्ति भंग तथा लागूऔषधसम्बन्धी गरी ३–४ प्रकारका कानुनी मुद्दा आकर्षित हुन सक्ने देखिएको छ। यद्यपि अन्तिम अभियोग अनुसन्धान र प्रमाणका आधारमा तय हुने जनाइएको छ।
यो घटनाले सामाजिक सञ्जालमा हिंसात्मक सामग्री प्रदर्शन, युवामाझ बढ्दो दुव्र्यवहार तथा लागुऔषधको पहुँचबारे फेरि बहस सुरु गरेको छ। नागरिकहरूले दोषीमाथि निष्पक्ष अनुसन्धान र कानुनी कारबाहीको माग गरेका छन्।
प्रहरीले घटनासम्बन्धी थप विवरण अनुसन्धानपछि सार्वजनिक गरिने जनाएको छ।
