युक्रेनका राष्ट्रपति भोलोडिमिर जेलेन्स्कीले रूससँगको युद्ध अन्त्य गर्ने नयाँ प्रयास स्वरूप रूसी राष्ट्रपति भ्लादिमिर पुटिनसँग प्रत्यक्ष भेटवार्ताको प्रस्ताव गर्नुभएको छ ।
राष्ट्रपति जेलेन्स्कीले राष्ट्रपति पुटिनलाई एक खुल्ला पत्र लेख्दै युरोपको युद्धमा अमेरिकी ध्यान पुनः केन्द्रित नभएसम्म पर्खिरहनु गलत हुने उल्लेख गर्नुभएको हाे । उहाँले युक्रेन र रूसबीचको प्रत्यक्ष संवादबाट मात्र शान्ति सम्भव हुने प्रष्ट पार्दै वार्ता अवधिभर पूर्ण युद्धविरामको प्रस्ताव समेत गर्नुभएको छ । पूर्ण युद्धविरामको प्रस्तावलाई राष्ट्रपति पुटिनले यसअघि नै अस्वीकार गरिसक्नुभएकाे छ। अमेरिकी राष्ट्रपति डोनाल्ड ट्रम्पले दुई नेताबीचको भेटवार्ता सकारात्मक हुने प्रतिक्रिया दिनुभएको छ भने क्रेमलिनले पत्र प्राप्त भएको र राष्ट्रपति पुटिनलाई यसकाे बारेमा जानकारी गराइने जनाएको हाे ।
राष्ट्रपति जेलेन्स्कीले पत्रमा २६ वर्ष सत्तामा रहेका पुटिनलाई उमेरले समात्दै गएको टिप्पणी समेत गर्नुभएको छ । यद्यपि, क्रेमलिनले राष्ट्रपति जेलेन्स्कीलाई मस्को आएर भेट्न स्वागत रहेको पुरानै जवाफ फर्काएको छ । अमेरिका हाल इरानको मुद्दामा पूर्ण रूपमा केन्द्रित रहेको कुरालाई कीभले सार्वजनिक रूपमा स्वीकार गर्नुलाई यस पटक अर्थपूर्ण रूपमा हेरिएको हाे ।
राष्ट्रपति पुटिनले अर्कातर्फ, सेन्ट पिटर्सबर्गमा पत्रकारहरूसँग कुरा गर्दै आफू सम्झौताका लागि तयार रहेको बताउनुभएकाे छ। तर त्यसका लागि युक्रेनले डोनेट्स्क, लुहान्स्क, खेरसन र जापोरोजिया जस्ता क्षेत्रहरू त्याग्नुपर्ने उहाँले अडान लिनुभयाे । युक्रेनले नेटो सदस्यताको प्रयास छाड्नुपर्ने अडान पनि उहाँले दोहोर्याउनुभएको छ ।
युक्रेनले भने भू-भाग छोड्दा रूस थप शक्तिशाली बन्ने भन्दै कुनै पनि हालतमा आफ्नो भूमि नत्याग्ने अडान लिइरहेको छ ।
