रामेछाप । राष्ट्रिय स्वतन्त्र पार्टी (रास्वपा) रामेछापको पहिलो ऐतिहासिक जिल्ला अधिवेशन नजिकिँदै जाँदा जिल्ला नेतृत्व चयन सहमतिमै टुङ्गिने सम्भावना बलियो बनेको छ । पार्टीभित्र विभिन्न चरणमा भएका छलफल, पालिका तहका प्रतिनिधिहरूको धारणा तथा विगतदेखि संगठन निर्माणमा नेतृत्वले खेलेको भूमिकाका आधारमा वर्तमान नेतृत्वलाई नै निरन्तरता दिने वातावरण बनेको बताइएको छ ।
रामेछापमा रास्वपाको संगठन विस्तारको सुरुवाती चरणदेखि सक्रिय रहँदै ‘निलो क्रान्ति’ भित्र्याउने अभियानको नेतृत्व गरेका रमेश रायमाझी पुनः जिल्ला सभापतिमा दोहोरिन सक्ने आँकलन गरिएको छ । रायमाझी नेतृत्वको तदर्थ समितिले छोटो समयमै जिल्लाका दुई नगरपालिका, छ गाउँपालिका तथा ६४ वटै वडामा पार्टी संगठन निर्माण गर्न सफल भएको भन्दै अधिकांश प्रतिनिधिहरू सकारात्मक देखिएका छन् ।
पार्टीभित्रको अनौपचारिक छलफल र कार्यकर्ताहरूबीचको संवादका आधारमा अधिवेशनबाट चयन हुने सम्भावित नेतृत्वको खाका समेत लगभग स्पष्ट बन्दै गएको छ । प्राप्त जानकारीअनुसार मोहन कार्की उपसभापति, दिलबहादुर थापा सचिव तथा टेकबहादुर सुनुवार (जोहोन) सहसचिव तथा संगठन विभाग प्रमुख बन्न सक्ने सम्भावना रहेको बताइन्छ ।
त्यसैगरी खेम रोका, ईश्वरी लामिछाने, अर्जुन श्रेष्ठ, कमल कार्की र लक्ष्मण बस्नेत सदस्यमा रहने गरी नेतृत्व चयन हुन सक्ने चर्चा पार्टी पङ्क्तिभित्र व्यापक रूपमा चलिरहेको छ । यद्यपि नेतृत्वको अन्तिम टुङ्गो भने अधिवेशनबाटै लाग्ने बताइएको छ ।
रास्वपा रामेछापका नेता–कार्यकर्ताहरूका अनुसार वर्तमान नेतृत्वले संगठन विस्तार, जनसम्पर्क अभिवृद्धि तथा पार्टीलाई गाउँ–गाउँसम्म पुर्याउन उल्लेखनीय भूमिका खेलेको छ । यही कारण अधिकांश नगरपालिका तथा गाउँपालिका सभापतिहरूले पनि नेतृत्वलाई निरन्तरता दिनुपर्ने धारणा व्यक्त गरेको बताइन्छ ।
विशेषगरी संगठन निर्माणको चुनौतीपूर्ण चरणमा नेतृत्वले देखाएको सक्रियता, कार्यकर्ताबीचको समन्वय र पार्टीको आधार विस्तारमा गरेको योगदानका कारण वर्तमान टिमप्रति विश्वास बढेको नेताहरूको भनाइ छ । यसले अधिवेशनमा प्रतिस्पर्धाभन्दा सहमतिको वातावरण बलियो बनाएको आकलन गरिएको छ ।
यदि अन्तिम समयसम्म कुनै नयाँ समीकरण वा उम्मेदवारी नउठेमा रमेश रायमाझी नेतृत्वको टिम सर्वसम्मत रूपमा चयन हुने सम्भावना उच्च रहेको पार्टी वृत्तमा चर्चा छ । यसले रास्वपा रामेछापभित्रको एकता, संगठनात्मक स्थिरता र साझा उद्देश्यलाई थप मजबुत बनाउने अपेक्षा गरिएको छ ।
आगामी जेठ २३ गते हुने प्रथम जिल्ला अधिवेशनलाई रास्वपा रामेछापको संगठनात्मक इतिहासमा महत्वपूर्ण मोडका रूपमा हेरिएको छ । अधिवेशनले नयाँ नेतृत्व चयनसँगै आगामी कार्ययोजना, संगठन सुदृढीकरण, जनसरोकारका मुद्दामा पार्टीको भूमिका तथा स्थानीय तहसम्म प्रभावकारी उपस्थितिका विषयमा समेत महत्वपूर्ण निर्णय गर्ने अपेक्षा गरिएको छ ।
पार्टीभित्र देखिएको सहमति र एकताको वातावरणले अधिवेशनलाई उत्साहपूर्ण बनाएको छ भने रामेछापमा रास्वपाको आगामी राजनीतिक यात्राका लागि पनि यस अधिवेशनलाई निर्णायक मानिएको छ ।
