काठमाडाैं । संविधान संशोधनको बहसपत्र तयार गर्न गठित कार्यदलले संविधान संशोधनका विषयमा नागरिकबाट ४४ हजार भन्दा बढी सुझाव प्राप्त गरेको छ ।
कार्यदलको सचिवालयले यहि जेठ ८ गते एक सूचना जारी गर्दै संविधानमा गर्नुपर्ने आवश्यक सुधार तथा संशोधनका विषयमा इच्छुक नेपाली नागरिकबाट लिखित सुझाव माग गरेको थियो । सोही सूचना अनुसार नागरिकले लिखित सुझाव दिएका हुन् । कार्यदलका अनुसार इमेलमार्फत १९ हजार २ सय ३९ र सामाजिक सञ्जाल ह्वाट्सएपमार्फत २५ हजार ३ सय ७४ सुझाव प्राप्त भएका छन् ।
कार्यकारी राष्ट्रपति, संघीयताको पुनरावलोकन, संवैधानिक निकायको पुनर्संरचना र पुनरावलोकन, निर्वाचन प्रणालीमा सुधार, न्यायपालिकाको सुधारका लागि प्रतिस्पर्धाबाट न्यायाधीशको नियुक्ति, जनप्रतिनिधिको योग्यता तोक्नुपर्ने लगायत विषयमा नागरिकबाट सुझाव प्राप्त भएको कार्यदलले जनाएकाे हाे । कार्यदलले अहिले प्राप्त सुझावहरू अध्ययन गरिरहेको छ ।
