काठमाडौँ । सशस्त्र प्रहरी बल नेपालले कञ्चनपुर जिल्लाको पुनर्वास क्षेत्रमा आएको आकस्मिक बाढीमा फसेका २० जनाको सकुशल उद्धार गरेको छ। दोदा नदी र बाहुन खोलामा पानीको बहाव एक्कासि बढेपछि जोखिममा परेका स्थानीय महिलाहरूलाई उद्धार गरिएको हो।
सशस्त्र प्रहरी बलका अनुसार पुनर्वास नगरपालिका–९ स्थित सिताबस्ती क्षेत्रमा पर्ने दोदा नदीमा अचानक पानीको सतह बढेपछि नदी तरेर नजिकैको जङ्गलमा निउरो टिप्न गएका पाँच जना महिला फसेका थिए। सशस्त्र प्रहरी बल नेपाल बिओपी बिचफाँटाबाट खटिएको टोलीले उनीहरूको सुरक्षित उद्धार गरेको जनाएको छ।
सशस्त्र प्रहरी नायब निरीक्षक शान्तबहादुर सुनारको नेतृत्वमा विपद् व्यवस्थापन तालिम प्राप्त टोली घटनास्थलमा पुगेर उद्धार कार्य सम्पन्न गरेको सशस्त्र प्रहरी बल नं. ७ वैद्यनाथ बाहिनी अत्तरियाले जनाएको छ।
त्यसैगरी पुनर्वास नगरपालिका–९ को हरियालीटोल क्षेत्रमा पर्ने बाहुन खोलामा पानीको बहाव बढेपछि दाउरा तथा घाँस सङ्कलन गर्न गएका १५ जना महिला पनि जोखिममा परेका थिए। उनीहरूलाई समेत सकुशल उद्धार गरिएको सशस्त्र प्रहरी बल नं. ७ वैद्यनाथ बाहिनीका बाहिनीपति सशस्त्र प्रहरी नायब महानिरीक्षक दिग्विजय सुवेदीले जानकारी दिएका छन्।
उद्धार अभियानमा सशस्त्र प्रहरीको विपद् व्यवस्थापन तालिम प्राप्त टोलीसँगै नेपाल प्रहरी, स्थानीय जनप्रतिनिधि तथा स्थानीयवासीको समेत सक्रिय सहयोग रहेको जनाइएको छ। संयुक्त प्रयासका कारण सबैलाई सुरक्षित स्थानमा ल्याउन सफल भएको सशस्त्र प्रहरीले जनाएको छ।
मनसुन सक्रिय भएसँगै पहाडी क्षेत्रमा भइरहेको वर्षाका कारण तराईका नदी तथा खोलाहरूमा अचानक पानीको बहाव बढ्ने जोखिम रहेको छ। यसले बाढी तथा डुबानको खतरा बढाउने भएकाले नदी, खोला तथा तटीय क्षेत्रमा बसोबास गर्ने नागरिकलाई विशेष सतर्कता अपनाउन सशस्त्र प्रहरी बल नं. ७ वैद्यनाथ बाहिनी मुख्यालयले आग्रह गरेको छ।
सुरक्षा निकायले मौसमको जानकारी नियमित रूपमा लिन, जोखिमयुक्त क्षेत्रमा अनावश्यक आवतजावत नगर्न तथा आकस्मिक अवस्था आएमा तत्काल सुरक्षा निकायलाई खबर गर्न सर्वसाधारणलाई अनुरोध गरेको छ। मनसुन अवधिभर विपद् व्यवस्थापनका लागि सुरक्षा निकायहरू उच्च सतर्कतामा रहेको जनाइएको छ।
