काठमाडाैं । भारत सरकारको निमन्त्रणामा राष्ट्रिय स्वतन्त्र पार्टी (रास्वपा) का सभापति रवि लामिछाने तीन दिने औपचारिक भ्रमणका लागि यहि जेठ १८ गते नयाँदिल्ली जानुहुने भएकाे छ।
नेपाल र भारतबीच पछिल्लो समय सीमा विवाद र कूटनीतिक तनाव बढिरहेकाे समयमा सभापति लामिछानेको भ्रमण हुन लागेको हो । तर दुवै पक्षले औपचारिक घोषणा भने गरेका छैनन् । नेपाल सरकारले लामिछानेको भ्रमणकाे बारेमा औपचारिक रूपमा जानकारी नभएको जनाएको छ ।
चुनावबाट झण्डै दुईतिहाइ बहुमत ल्याएको रास्वपाले बालेन्द्र शाह नेतृत्वमा नयाँ सरकार गठन गरेसँगै नेपाल–भारत सम्बन्धबारे चासो र भारत भ्रमणको विषयमा चर्चा हुँदै आएको हाे । प्रधानमन्त्री शाहको दिल्ली भ्रमण अहिलेसम्म अनिश्चित छ ।
यसबीचमा सभापति लामिछाने नयाँ दिल्ली जान लाग्नुभएको हो । रास्वपा सभापति लामिछानेको भारत भ्रमणबारे भारतीय मिडियाले पनि चासो देखाएका छन् । भ्रमणको क्रममा लामिछानेले भारतीय विदेशमन्त्री एस जयशंकर, विदेश सचिव विक्रम मिश्रीसहित उच्च अधिकारीसँग भेट गर्ने तयारी छ ।
सभापति लामिछानेको भ्रमण भारतीय विदेश सचिव मिस्रीको काठमाडाैं भ्रमण स्थगित भएको र सीमा विवाद चर्किएको पृष्ठभूमिमा हुन लागेको हो । सरकारका प्रवक्ता सस्मित पोखरेलले सभापति लामिछानेको भारत भ्रमणसँग प्रधानमन्त्री शाहको कुनै सम्बन्ध नरहेको जनाउनुभएको छ ।
सिंहदरबारमा साेमबार बसेको मन्त्रिपरिषद् बैठकपछि प्रवक्ता पोखरेलले सभापति आफ्नै ढंगले भारत जान लागेको बताउनुभयो ।
