काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने तीनदिने भारत भ्रमणमा जाने भएका छन् ।
रास्वपाका अनुसार लामिछाने जेठ १८ गते नयाँ दिल्ली प्रस्थान गर्नेछन् । उनको नेतृत्वमा जाने प्रतिनिधिमण्डलमा पार्टीका सहमहामन्त्री विपिन आचार्य र विदेश विभाग प्रमुख दीपक बोहरा सहभागी रहनेछन् । त्यसैगरी लामिछानेकी पत्नी निकिता पौडेल तथा स्वकीय सचिव अविनाश आचार्य पनि भ्रमण टोलीमा रहने जनाइएको छ ।
रास्वपाका अनुसार जेठ १९ गते भाजपा अध्यक्ष नीतिन नवीनले भाजपा मुख्यालयमा लामिछानेलाई स्वागत गर्ने कार्यक्रम तय भएको छ । सो अवसरमा दुई पक्षबीच औपचारिक संवादसमेत हुने बताइएको छ ।
त्यसैदिन लामिछानेले भारतीय प्रधानमन्त्री नरेन्द्र मोदीसँग पनि भेटवार्ता गर्ने कार्यक्रम रहेको रास्वपाले जनाएको छ । यद्यपि भेटको समय भने सार्वजनिक गरिएको छैन । भारतीय विदेशमन्त्री एस जयशंकरसहित केही मन्त्रीहरूसँगको भेटवार्ताको तालिका भने तय भइसकेको बताइएको छ ।
नेपालमा नयाँ सरकार गठन भएपछि नेपालबाट भारततर्फ हुन लागेको यो उच्चस्तरीय राजनीतिक भ्रमणमध्ये एक मानिएको छ ।
भारतले विभिन्न समयमा नेपालका प्रमुख राजनीतिक दलका नेताहरूलाई भ्रमणका लागि निमन्त्रणा दिँदै आएको छ । भारतीय विदेश मन्त्रालय र भारतीय जनता पार्टीको समन्वयमा यस्ता भ्रमणहरू हुने गरेका छन् । यसअघि पूर्वप्रधानमन्त्रीहरू शेरबहादुर देउवा र पुष्पकमल दाहालले पनि भाजपाको निमन्त्रणामा भारत भ्रमण गरिसकेका छन् ।
सभापति लामिछाने नेतृत्वको प्रतिनिधिमण्डल जेठ २० गते स्वदेश फर्किने कार्यक्रम रहेको छ ।
