काठमाडौं । उमाशंकर अरगरियाले नेकपा एमाले परित्याग गरेका छन् । एमालेका नेता तथा प्रतिनिधि सभा सदस्यका पूर्वप्रत्याशी रहेका अरगरियाले आइतबार पार्टी अध्यक्ष केपी शर्मा ओलीलाई सम्बोधन गर्दै पार्टीको साधारण सदस्यसमेत नरहने गरी राजीनामा दिएको घोषणा गरेका हुन् ।
लामो समयदेखि पार्टीभित्र आफू र आफूसँग आएका नेता–कार्यकर्तालाई उचित स्थान तथा जिम्मेवारी नदिइएको भन्दै उनले गम्भीर असन्तुष्टि व्यक्त गरेका छन् । एमालेमा प्रवेश गरेको वर्षौं बितिसक्दा पनि आफू निकट कार्यकर्ताको समायोजन हुन नसकेको, संगठनभित्र निष्पक्षता कायम नभएको तथा इमान्दार कार्यकर्तालाई निरन्तर अपमान गरिएको भन्दै उनले पार्टी नेतृत्वप्रति आक्रोश पोखेका छन् ।
अरगरियाले जारी गरेको वक्तव्यमा आफू एमालेमा प्रवेश गर्दा ठूलो आशा र विश्वासका साथ आएको उल्लेख गर्दै व्यवहारमा भने त्यसको विपरीत अवस्था भोग्नुपरेको बताएका छन् । “एमालेमा प्रवेश गरेको निकै वर्ष हुन लाग्दा पनि आजसम्म हामीसँग आएका साथीहरूको समायोजन हुन सकेको छैन । आजसम्म मसँग आएका साथीहरू कमिटीविहीन छन्,” उनले वक्तव्यमा उल्लेख गरेका छन् ।
उनले पार्टीभित्र संगठन शुद्धीकरणको अभाव रहेको आरोप लगाउँदै पार्टीको आधिकारिक उम्मेदवारलाई पटकपटक हराउने व्यक्तिहरूलाई नै नेतृत्व तहबाट संरक्षण र पुरस्कार दिने प्रवृत्ति मौलाएको टिप्पणी गरेका छन् । “लगनशील तथा इमान्दार कार्यकर्ताहरू अपहेलित हुने, पार्टीविरुद्ध लाग्नेहरू नै सम्मानित हुने प्रवृत्तिले आजित भएको छु,” अरगरियाले बताएका छन् ।
उनका अनुसार जिल्लास्तरको नेतृत्वबाट आफू पटकपटक अपमानित हुनुपरेको थियो । यस्ता विषयमा पार्टीको केन्द्रीय नेतृत्वलाई बारम्बार जानकारी गराउँदा पनि कुनै सुनुवाइ नभएको भन्दै उनले अन्ततः पार्टी त्याग्ने निष्कर्षमा पुगेको जनाएका छन् ।
अरगरिया २०७९ भदौ ३० गते लोकतान्त्रिक समाजवादी पार्टी (लोसपा) परित्याग गरी एमालेमा प्रवेश गरेका थिए । मधेश प्रदेशको राजनीतिमा प्रभावशाली नेतामध्ये एक मानिएका उनी धनुषा–२ बाट प्रतिनिधि सभा सदस्य निर्वाचनका उम्मेदवारसमेत बनेका थिए ।
उनको पार्टी परित्यागलाई मधेश राजनीतिमा अर्थपूर्ण घटनाका रूपमा हेरिएको छ । विशेषगरी एमालेभित्र मधेशी नेताहरूको भूमिका, सम्मान र व्यवस्थापनको विषय फेरि चर्चामा आएको राजनीतिक विश्लेषकहरूको भनाइ छ ।
अरगरियाको राजीनामापछि एमालेले औपचारिक प्रतिक्रिया भने सार्वजनिक गरिसकेको छैन । तर उनको निर्णयले मधेश क्षेत्रमा पार्टी संगठनमा थप प्रभाव पार्न सक्ने आकलन गरिएको छ ।
