काठमाडाैं । नेकपा एमालेका अध्यक्ष केपी शर्मा ओलीलाई नेतृत्व छाेड्न पार्टीभित्रबाटै दबाब बढेको छ ।
गुण्डुमा शनिबार बसेको एमालेकाे सचिवालय बैठकमा पनि नेताहरूले पार्टीलाई बलियो बनाउनको लागि पद त्याग गरेर सहयोग गर्न अध्यक्ष ओलीसँग आग्रह गरेका हुन् । उनीहरूले पार्टीलाई रूपान्तरण र पुनर्गठन गर्नुपर्ने भन्दै ओलीलाई नेतृत्व छाेड्न दबाब दिएका छन् ।
गत शुक्रबारको बैठकमा रामबहादुर थापा बादल बाहेकका अरू चार उपाध्यक्ष र शनिबार महासचिव शंकर पोखरेलसहित तीन उपमहासचिव र पाँच सचिवले अध्यक्ष ओलीले पार्टी बनाउन पद त्याग गरेर सहयोग गर्नुपर्ने बताएका छन् । हाल उपाध्यक्ष बादल र सचिव महेश बस्नेत मात्र अध्यक्ष ओलीको पक्षमा उभिएका हुन् ।
तर ओलीले आफ्नाविरुद्ध जति गतिविधि भए पनि पद नछाेड्ने अडान लिनुभएको छ । नेताहरूले पार्टी पुनर्गठन र मार्ग प्रशस्तको कुरा गरेपछि ओलीले नेतृत्व नछाेड्ने जवाफ दिनुभएको हो । यसैबीच उपमहासचिव लेखराज भट्टले पार्टीभित्र नेतृत्व परिवर्तनको कुनै सम्भावना नरहेको जिकिर गर्नुभएकाे छ । शनिबार सचिवालय बैठकपछि पत्रकारसँग कुरा गर्दै उहाँले नेतृत्व परिवर्तन र राजीनामाका हल्लालाई ‘अतिरञ्जित’को संज्ञा दिनुभयो ।
बैठकमा महासचिव, तीन उपमहासचिव र पाँच सचिवले पार्टीको आन्तरिक अवस्था र आफ्ना अनुभवका बारेमा धारणा राखेका उहाँको भनाइ छ । अध्यक्षकै नेतृत्वमा विद्यमान समस्याहरूको समाधान गर्दै उहाँकै कमान्डमा पार्टी एकताबद्ध भएर अघि बढ्नुपर्छ भन्ने नै सबैको साझा निष्कर्ष रहेको उहाँले बताउनुभयो ।
अस्ति शुक्रबारदेखि शुरु भएको एमाले सचिवालय बैठक आइतबार पनि बस्दैछ ।
