काठमाडौँ । नेपाल टेलिकमले डोल्पाको छार्का ताङसोङ गाउँपालिकाको केन्द्र कागकोटमा पहिलो पटक फोरजी सेवा सञ्चालनमा ल्याएको छ ।
समुद्री सतहदेखि चार हजार २०० मिटर उचाइमा रहेको मुकोटस्थित टावरमा फोरजी उपकरण जडान गरी माइक्रोवेभ रेडियोमार्फत सेवा सञ्चालन गरिएको नेपाल टेलिकमका प्रवक्ता डा. कमल लामिछानेले जानकारी दिए ।
यससँगै नेपाल टेलिकमको फोरजी सेवा पुगेका स्थानीय तहको संख्या ७५० पुगेको छ । माथिल्लो डोल्पामा सञ्चालनमा ल्याइएको यो पहिलो फोरजी साइट भएको जनाइएको छ ।
हालसम्म डोल्पाका डोल्पो बुद्ध गाउँपालिका र शे फोक्सुन्डो गाउँपालिका तथा मनाङको नार्पा भूमि गाउँपालिकामा फोरजी सेवा पुग्न बाँकी रहेको छ । नेपाल टेलिकमले निकट भविष्यमा ती क्षेत्रमा पनि सेवा विस्तार गर्ने जनाएको छ ।
फोरजी सेवा विस्तार भएसँगै स्थानीय बासिन्दा, पदयात्री तथा पर्यटकलाई सञ्चार सुविधा सहज हुने अपेक्षा गरिएको छ । साथै प्रशासनिक, सुरक्षा, स्वास्थ्य र शैक्षिक गतिविधिमा समेत सहयोग पुग्ने विश्वास गरिएको छ ।
दुर्गम हिमाली क्षेत्रलाई आधुनिक डिजिटल सञ्जालसँग जोड्दा समग्र क्षेत्रीय विकासमा सकारात्मक योगदान पुग्ने नेपाल टेलिकमको भनाइ छ ।
नेपाल टेलिकमले देशका सुगमदेखि अति दुर्गम स्थानसम्म अत्याधुनिक दूरसञ्चार सेवा तथा सूचना प्रविधिको पहुँच विस्तार गर्ने कार्यलाई निरन्तरता दिएको जनाएको छ ।
