एजेन्सी । अमेरिकाले आफूमाथि आक्रमण गरे त्यसको जवाफ नयाँ तरिकाले दिने इरानले चेतावनी दिएको छ ।
अन्तर्राष्ट्रिय सञ्चारमाध्यमहरूले कुनै पनि अन्य देशको लहडमा आएर आफूमाथि आक्रमण गरे नयाँ हतियार र रणनीति प्रयोग गर्ने इरानको चेतावनी जनाएका हुन् । इरानी सेनाका प्रवक्ता मोहम्मद अकरमिनियाले इजरायली जालमा फसेर नयाँ कारबाही हुन्छ भने त्यसको जवाफ नयाँ उपकरण र नयाँ तरिकाहरूका साथ हुने चेतावनी दिनुभएको छ ।
केही दिनअघि अमेरिकी राष्ट्रपति डोनाल्ड ट्रम्पले आफू शान्ति सम्झौताको सम्भावनालाई जीवित राख्न चाहेको भन्दै इरानमाथि तत्काल आक्रमण नगर्ने बताउनुभएको थियो । राष्ट्रपति ट्रम्पको यो अभिव्यक्तिपछि तनाव कम हुने अपेक्षा गरिएको थियो । तर, इरानको यो नयाँ चेतावनीले परिस्थितिलाई पुनः गम्भीर बनाएको छ ।
इरानी सेनाले आफ्नो वक्तव्यमा कुनै पनि सम्भावित सैन्य कारबाहीको जवाफ पहिले भन्दा अझ व्यापक रूपमा दिन सकिने स्पष्ट संकेत गरेकाे हाे । यद्यपि, इरानले ती ‘नयाँ मोर्चा’ वा ‘नयाँ सैन्य रणनीति’ कस्तो स्वरूपकाे हुने छन् भन्ने विषयमा थप विवरण सार्वजनिक गरेको छैन ।
साेही वक्तव्य सार्वजनिक भएसँगै क्षेत्रीय सुरक्षा अवस्था तथा सम्भावित सैन्य संघर्षलाई लिएर चिन्ता फेरि बढेको समाचारमा उल्लेख गरिएकाे छ ।
