काठमाडाैं । आन्तरिक राजस्व कार्यालय हेटौंडा मकवानपुरले चालु आर्थिक वर्ष २०८२/०८३ को १० महिनामा करिब ६ अर्ब रुपैयाँ राजस्व संकलन गरेको छ ।
कार्यालय प्रमुख युक्तप्रसाद सुवेदीले बक्यौता असुली र बजार अनुगमनलाई तीव्रता दिएकाले आर्थिक वर्ष २०८१/८२ को तुलनामा ३४ करोड २१ लाख २४ हजार बढी अर्थात् पाँच अर्ब ९२ करोड ६४ लाख राजस्व संकलन भएको बताउनुभएकाे हाे । । गत वैशाखसम्ममा अन्त शुल्कतर्फ तीन अर्ब ४५ करोड ६२ लाख ६५ हजार र आयकरतर्फ एक अर्ब दुई करोड चार लाख ९६ हजार रुपैयाँ राजस्व संकलन भएको छ ।
त्यस्तै, मूल्यअभिवृद्धि करतर्फ ८२ करोड ७१ लाख ५२ हजार, स्वास्थ्य जोखिम करतर्फ ५१ करोड ९२ लाख ५९ हजार, ब्याजकरतर्फ ६ करोड ८३ लाख ७७ हजार र बहालकरतर्फ एक करोड ५९ लाख ८८ हजार रुपैयाँ राजस्व संकलन भएको हाे । प्रमुख सुवेदीले चालु आर्थिक वर्षमा आठ अर्ब ४४ करोड राजस्व संकलन गर्ने वार्षिक लक्ष्य रहेकाे बताउनुभयाे।
करदाताहरुको घरमा पुग्ने, टेलिफोन र एसएमएसमार्फत ताकेदा गर्ने, कर छुटसम्बन्धी सुविधाबारे प्रचारप्रसार गर्ने लगायतका अभियान सञ्चालन गरी करिब १० करोड भन्दा बढी पुरानो वक्यौता अशुली भएको राजस्व कार्यालयले जनाएकाे छ ।
