काठमाडाैं । सत्तारुढ दल राष्ट्रिय स्वतन्त्र पार्टी (रास्वपा)को वडा अधिवेशन आइतबार हुँदैछ ।
गत वैशाख २० गते अघि तदर्थ समिति गठन भएका करिब १५ सय वडाको अधिवेशन आइतबार गर्न लागिएको हो । संगठन विभाग सचिव शंकर श्रेष्ठले करिब ३ हजार वडामा तदर्थ समिति बनिसकेकाे बताउनुभयाे । जसमध्ये ५० प्रतिशतको अधिवेशन चुनाव अघि र पछि गरेर सकिएको छ ।
तदर्थ समिति बनेका तर वडा अधिवेशन हुन नसकेका बाँकी वडाको अधिवेशन आज हुनेछ । दुई चरणमा वडा अधिवेशन सम्पन्न गर्ने निर्णय गरेको रास्वपाले बाँकी वडाहरुको अधिवेशन यहि जेठ १६ गते गर्नेछ । पालिका अधिवेशन पनि दुई चरणमा गर्ने मिति तोकिएको हाे । जेठ ९ र १७ गते पालिका अधिवेशन हुनेछ । कुनै पालिकाको वडाहरू मध्ये ३० प्रतिशत र जिल्लाको हकमा पनि ३० प्रतिशत पालिकाको अधिवेशन भए उपल्लो तहको अधिवेशन नरोकिने निर्णय रास्वपाले गरेको हाे ।
रास्वापाले जेठ २३ र २४ गते जिल्ला अधिवेशन गर्ने भएको छ । प्रदेश अधिवेशन जेठ २६ बाट शुरु गरेर असार १ गते सक्ने कार्यतालिका बनाइएको छ । रास्वपाको प्रथम केन्द्रीय महाधिवेशन असार ७ देखि ९ गतेसम्म चितवनमा हुने भएकाे छ ।
पार्टी गठन भएको ठिक चार वर्ष पुगेकै दिन पहिलो महाधिवेशनको मिति तय गरिएकाे रास्वपाले जनाएकाे हाे ।
