काठमाडौं । नेपाल प्रहरी ले प्राविधिकतर्फ विभिन्न पदमा ४ सयभन्दा बढी संख्यामा भर्ना खुलाएको छ।
प्रहरीद्वारा जारी सूचनाअनुसार प्रहरी नायव उपरीक्षक, प्रहरी निरीक्षक, प्रहरी नायव निरीक्षक, प्रहरी सहायक निरीक्षक तथा प्रहरी जवान पदहरूमा आवेदन माग गरिएको हो। इन्जिनियरिङतर्फ कम्प्युटर, सञ्चार, सिभिल, इलेक्ट्रिकल, बिल्डिङ एण्ड आर्किटेक्चर तथा अटोमोबाइल क्षेत्र समेटिएका छन्।
यस्तै, विधि विज्ञानतर्फ बायोलोजी र रसायन विषय तथा स्वास्थ्यतर्फ मेडिकल अफिसर, डेन्टल अधिकृत, डाइटेटिक्स, फिजियोथेरापी टेक्नोलोजिस्ट, स्टाफ नर्स, फार्मेसी असिस्टेन्ट र सीएमए लगायतका पदमा समेत भर्ना खुलाइएको छ।
सूचनाअनुसार प्रहरी जवानतर्फ २ सय ८० जना र अन्य पदहरूमा १ सय २९ जनाका लागि दरखास्त आह्वान गरिएको छ।
दरखास्त बुझाउने म्याद प्रहरी नायव उपरीक्षक, प्रहरी निरीक्षक, प्रहरी नायव निरीक्षक र प्रहरी सहायक निरीक्षकका लागि चैत २५ गतेदेखि वैशाख २४ गतेसम्म तोकिएको छ। प्राविधिक प्रहरी जवान पदका लागि भने चैत २६ गतेदेखि वैशाख ३१ गतेसम्म आवेदन दिन सकिनेछ।
