काठमाडौं । जेनजी आन्दोलनमा दमन गरेको आरोपमा पक्राउ परेका पूर्वप्रधानमन्त्री एवं नेकपा एमालेका अध्यक्ष केपी शर्मा ओली र पूर्वगृहमन्त्री एवं नेपाली कांग्रेस नेता रमेश लेखक लाई आइतबार काठमाडौं जिल्ला अदालतमा उपस्थित गराइने भएको छ ।
प्रहरीले दुवै जनालाई थुनामा राखेर अनुसन्धान गर्न जिल्ला सरकारी वकिलको कार्यालय हुँदै अदालतमा पेश गर्ने तयारी गरेको हो । प्रचलित कानुनी व्यवस्थाअनुसार उनीहरूलाई अधिकतम २४ दिनसम्म थुनामा राखेर अनुसन्धान गर्न सकिने भए पनि त्यसका लागि अदालतको अनुमति आवश्यक पर्नेछ ।
पक्राउपछि ओलीलाई स्वास्थ्य समस्या देखिएपछि अस्पतालमा भर्ना गरिएको छ भने लेखकलाई महाराजगञ्जस्थित प्रहरीको २ नम्बर गणमा राखिएको छ ।
गत भदौ २३ र २४ गते भएको जेनजी आन्दोलनका घटनाबारे छानबिन गर्न गठित गौरीबहादुर कार्की नेतृत्वको आयोगको प्रतिवेदन कार्यान्वयनका क्रममा प्रहरीले शनिबार बिहान भक्तपुरबाट दुवै जनालाई पक्राउ गरेको हो ।
उक्त आन्दोलन हिंसात्मक बन्दा तीन जना प्रहरीसहित ७६ जनाको मृत्यु भएको थियो भने दुई हजार चार सयभन्दा बढी प्रदर्शनकारी गम्भीर घाइते भएका थिए । प्रदर्शनका क्रममा सिंहदरबार, संसद भवन, सर्वोच्च अदालत, राष्ट्रपति भवन, प्रहरी कार्यालय, व्यापारिक प्रतिष्ठान तथा निजी निवासमा आगजनी, तोडफोड र लुटपाटका घटना भएका थिए ।
