काठमाडौं — पूर्वप्रधानमन्त्री तथा नेकपा (एमाले)का अध्यक्ष केपी शर्मा ओली र पूर्वगृहमन्त्री तथा कांग्रेस नेता रमेश लेखक को स्वास्थ्य परीक्षण प्रक्रिया प्रहरीले अघि बढाएको छ।
भक्तपुरको गुण्डुस्थित ओली निवास र कटुन्जेस्थित लेखक निवासबाट शनिबार बिहान पक्राउ गरिएका उनीहरूलाई हाल जिल्ला प्रहरी परिसर भद्रकाली, काठमाडौंमा राखिएको छ।
प्रहरी परिसर काठमाडौंका एसपी तथा प्रवक्ता पवनकुमार भट्टराई का अनुसार पक्राउपछि स्वास्थ्य परीक्षण गर्नु नियमित प्रक्रिया हो। उनले स्वास्थ्य अवस्था सामान्य देखिएपछि हिरासतमा राख्ने प्रक्रिया अघि बढ्ने जानकारी दिएका छन्।
आज शनिबार सार्वजनिक बिदा परेकाले म्याद थपका लागि अदालत उपस्थित गराउन नसकिने हुँदा दुवै जना आजै हिरासतमा रहने सम्भावना रहेको प्रहरीले जनाएको छ। यसबीच उनीहरूले कानुनी परामर्श पनि अघि बढाएका छन्।
उनीहरूमाथि गत भदौ २३ र २४ गतेको जेन–जी आन्दोलनका क्रममा हेलचेक्र्याइँ गरी ज्यान मारेको अभियोग लगाइएको छ। मुलुकी अपराध संहिताका दफा २८१, २८२ र २८३ अनुसार यस्तो कसुरमा कारबाहीको व्यवस्था रहेको छ।
उक्त घटनाको छानबिनका लागि गठित गौरीबहादुर कार्की आयोग ले कारबाही सिफारिस गरेपछि मन्त्रिपरिषद् बैठकले प्रतिवेदन कार्यान्वयन गर्ने निर्णय गरेको थियो।
