काठमाडौं । मौसम पूर्वानुमान महाशाखा ले हाल देशमा पश्चिमी न्यून चापीय प्रणालीसँगै स्थानीय वायुको आंशिक प्रभाव रहेको जनाएको छ । यसका कारण देशका विभिन्न भागमा बदली, वर्षा र हिमपातको सम्भावना रहेको बताइएको छ ।
महाशाखाका अनुसार अहिले सुदूरपश्चिम प्रदेश सहित देशका पहाडी तथा हिमाली भू–भागमा सामान्यदेखि पूर्ण बदली रहेको छ भने तराईका अधिकांश भू–भागमा मौसम मुख्यतया सफा रहेको छ ।
हाल बागमती प्रदेश र गण्डकी प्रदेश का पहाडी तथा हिमाली क्षेत्रमा केही स्थानमा तथा कोशी प्रदेश का एक–दुई स्थानमा मेघगर्जन र चट्याङसहित हल्कादेखि मध्यम वर्षा तथा हिमपात भइरहेको छ ।
दिउँसोको पूर्वानुमान
आज दिउँसो हिमाली क्षेत्रमा अधिकांश बदली रहनेछ भने पहाडी क्षेत्रमा सामान्य बदली र तराईमा आंशिक बदली रहनेछ ।
कोशी, बागमती र गण्डकी प्रदेशका पहाडी तथा हिमाली भागका धेरै स्थानमा मेघगर्जन, चट्याङ, हुरी र असिनासहित मध्यम वर्षाको सम्भावना रहेको छ । अन्य प्रदेशका केही पहाडी क्षेत्रमा पनि यस्तै गतिविधि देखिन सक्नेछ ।
तराईका केही स्थानमा पनि मध्यम वर्षा हुने सम्भावना रहेको महाशाखाले जनाएको छ ।
रातिको अवस्था
आज राति हिमाली भू–भागमा अधिकांश बदली रहनेछ भने कोशी र मधेश प्रदेशका पहाडी क्षेत्रमा सामान्य बदली तथा तराई क्षेत्रमा आंशिक बदली रहनेछ ।
कोशी, मधेश, बागमती, गण्डकी र लुम्बिनी प्रदेशका केही स्थानमा तथा कर्णाली र सुदूरपश्चिमका पहाडी तथा हिमाली भागमा मेघगर्जन, चट्याङ, हुरी र असिनासहित वर्षा तथा हिमपातको सम्भावना रहेको छ ।
सतर्कता अपिल
मौसम पूर्वानुमान महाशाखा ले विशेषगरी कोशी, बागमती र गण्डकी प्रदेशका पहाडी तथा हिमाली क्षेत्रमा बढी जोखिम रहने भएकाले सतर्क रहन आग्रह गरेको छ ।
संभावित वर्षा, हिमपात र हुरीका कारण दैनिक जनजीवन, यातायात तथा कृषि क्षेत्रमा असर पर्न सक्ने भएकाले सर्वसाधारण र सम्बन्धित निकायलाई आवश्यक सावधानी अपनाउन अनुरोध गरिएको छ ।
