काठमाडौं — राष्ट्रिय मानव अधिकार आयोग का अध्यक्ष तपबहादुर मगर ले अब बन्ने सरकारले जातीय विभेद हुन नदिने गरी प्रभावकारी कदम चाल्नुपर्ने बताएका छन्।
६१औँ अन्तर्राष्ट्रिय जातीय तथा रंगभेद उन्मूलन दिवसका अवसरमा काठमाडौंमा आयोजित कार्यक्रममा बोल्दै उनले दलित समुदायको हक अधिकारको संरक्षण, संवर्द्धन र प्रवर्द्धनमा सरकार सचेत हुन आवश्यक रहेको बताए।
अध्यक्ष मगरले जातीय विभेद अन्त्यका लागि कानुन भए पनि त्यसको प्रभावकारी कार्यान्वयन मुख्य चुनौती रहेको उल्लेख गरे। उनले राजनीतिक प्रतिबद्धता र समाजको मानसिक परिवर्तन बिना विभेद अन्त्य सम्भव नहुने धारणा राखे।
उनले भने, “मानिसको मानसिकतामा पनि परिवर्तन ल्याउनुपर्छ। कानुन भएर मात्रै हुँदैन, कार्यान्वयनका लागि राजनीतिक प्रतिबद्धता पनि चाहिन्छ।”
उनले आगामी सरकारलाई दलित समुदायको अधिकार कुनै पनि किसिमले हनन नहुने सुनिश्चित गर्न विशेष ध्यान दिनुपर्ने सुझाव दिए। साथै, जातीय विभेद अन्त्यका लागि नेपाली समाजमा गहिरो मानसिक परिवर्तन आवश्यक रहेको पनि उनले जोड दिए।
