काठमाडौं । सङ्घीय संसद सचिवालय ले नयाँ निर्वाचित प्रतिनिधि सभा सदस्यहरूको शपथ ग्रहण आगामी १२ गते गर्नेगरी तयारी अगाडि बढाएको छ। बिहीवार सचिवालयका महासचिवले राष्ट्रिय मान्यता प्राप्त दलका प्रतिनिधिहरूसँग गरेको छलफलमा शपथ ग्रहणको मिति तथा संसदीय दलका कार्यालय व्यवस्थापनबारे विस्तृत कुराकानी भएको हो।
छलफलमा सहभागी सांसदहरूका अनुसार मुख्य ध्यान शपथ ग्रहणको मिति निर्धारण र संसदीय दलका कार्यालयहरूको व्यवस्थापनमा केन्द्रित रहेको थियो। नेपाल कम्युनिष्ट पार्टी का सांसद रमेश मल्ल ले १२ गते शपथ गर्नेगरी तयारी भइरहेको जानकारी दिए।
उनका अनुसार निर्वाचन आयोग ले अन्तिम सूची पठाएपछि र राष्ट्रपति कार्यालय बाट समय सुनिश्चित भएपछि शपथको औपचारिक मिति टुंगो लाग्नेछ। ‘मुख्यतः १२ गते शपथ गर्ने तयारी छ, सूची र समय सुनिश्चित भएपछि औपचारिक घोषणा हुन्छ,’ उनले भने।
यसैबीच, राष्ट्रिय प्रजातन्त्र पार्टी का सांसद ज्ञानबहादुर शाही ले आफूहरू प्रतिपक्षको भूमिकामा बस्ने स्पष्ट पारे। उनले बैठकमा सांसदहरूको डकुमेन्टेसन, फोटो खिच्ने, फारम भर्ने तथा नयाँ भवन व्यवस्थापनका विषयमा छलफल भएको जानकारी दिए।
त्यस्तै, राष्ट्रिय स्वतन्त्र पार्टी का सांसद कविन्द्र बुर्लाकोटी ले दलको आकारअनुसार संसदीय दलका कार्यालयहरू व्यवस्थापन गर्ने तयारी भइरहेको बताए। ‘कार्यालय कहाँ रहने भन्ने विषयमा छलफल भयो, केही हेरफेर हुन सक्छ,’ उनले भने।
संसद सचिवालयका अनुसार निर्वाचन आयोगले सांसदहरूको अन्तिम नामावली राष्ट्रपति कार्यालय पठाउने प्रक्रिया अघि बढाइसकेको छ। त्यसपछि शपथ ग्रहणको समय केही दिनमै औपचारिक रूपमा सार्वजनिक गरिनेछ।
साथै, सचिवालयले नयाँ कार्यकालका लागि आवश्यक प्रशासनिक तथा भौतिक पूर्वाधार व्यवस्थापनलाई पनि तीव्रता दिएको जनाएको छ। नयाँ सांसदहरूलाई सहज रूपमा कार्य प्रारम्भ गर्न आवश्यक सम्पूर्ण तयारी अन्तिम चरणमा पुगेको बताइएको छ।
