काठमाडौं । हाल देशमा पश्चिमी न्यून चापीय प्रणालीको आंशिक प्रभाव रहेको छ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार अहिले मुलुकका पहाडी र हिमाली क्षेत्रमा साधारणतया बदली रहेको छ भने अन्य भू–भागमा आंशिक बदली रहने अवस्था छ।
आज दिउँसो लुम्बिनी, कर्णाली र सुदूरपश्चिम प्रदेशसहित अन्य पहाडी तथा हिमाली क्षेत्रमा सामान्यदेखि मध्यम बदली रहनेछ भने बाँकी भू–भागमा आंशिक बदली रहनेछ। गण्डकी, कर्णाली र सुदूरपश्चिम प्रदेशका हिमाली भू–भागका केही स्थानमा तथा कोशी, बागमती र लुम्बिनी प्रदेशका हिमाली क्षेत्रका थोरै स्थानमा मेघगर्जन/चट्याङसहित मध्यम वर्षा तथा हिमपातको सम्भावना रहेको महाशाखाले जनाएको छ।
यस्तै कर्णाली र सुदूरपश्चिम प्रदेशका पहाडी क्षेत्रका थोरै स्थानमा तथा अन्य प्रदेशका पहाडी क्षेत्रका एक–दुई स्थानमा मेघगर्जन, चट्याङ र असिनासहित मध्यम वर्षा हुन सक्ने सम्भावना रहेको छ। तराईका एक–दुई स्थानमा भने मेघगर्जन/चट्याङसहित हल्का वर्षा हुन सक्ने पूर्वानुमान गरिएको छ।
महाशाखाका अनुसार आज राति कर्णाली र सुदूरपश्चिम प्रदेशका पहाडी तथा हिमाली भू–भाग र अन्य प्रदेशका हिमाली क्षेत्रमा साधारणतया बदली रहनेछ। बाँकी पहाडी तथा तराई भू–भागमा भने आंशिक बदली रहनेछ।
राति गण्डकी, कर्णाली र सुदूरपश्चिम प्रदेशका हिमाली क्षेत्रका थोरै स्थानमा तथा अन्य हिमाली क्षेत्रका एक–दुई स्थानमा मेघगर्जन/चट्याङसहित हल्का वर्षा वा हिमपातको सम्भावना रहेको छ। साथै गण्डकी, कर्णाली र सुदूरपश्चिम प्रदेशका पहाडी भू–भागका एक–दुई स्थानमा मेघगर्जन/चट्याङसहित हल्का वर्षा हुन सक्ने महाशाखाले जनाएको छ।
