काठमाडौं । अमेरिका, इजरायल र इरानबीच बढ्दै गएको तनावका बीच पनि भारतका दुई जहाज सुरक्षित रूपमा होर्मुज स्ट्रेट पार गर्न सफल भएका छन्। भारतीय विदेश मन्त्रालयले शनिबार यसको पुष्टि गरेको हो।
भारतीय विदेश मन्त्रालयका प्रवक्ता रणधीर जयसवालका अनुसार ‘शिवालिक’ र ‘नन्दा देवी’ नामका दुई भारतीय जहाज स्ट्रेट पार गरेर भारतका बन्दरगाहतर्फ अघि बढिरहेका छन्। ती जहाजमा ठूलो मात्रामा तरल पेट्रोलियम ग्यास (एलपीजी) लोड गरिएको छ।
उनका अनुसार दुवै जहाजमा गरी करिब ९३ हजार मेट्रिक टनभन्दा बढी एलपीजी रहेको छ। मध्यपूर्व क्षेत्रमा तनाव बढिरहेका बेला जहाजहरू सुरक्षित रूपमा होर्मुज स्ट्रेट पार गर्न सफल भएको भारतीय पक्षले महत्वपूर्ण उपलब्धिका रूपमा लिएको छ।
प्रवक्ता जयसवालका अनुसार खाडी क्षेत्रमा भारतका अन्य केही जहाजहरू पनि तयारी अवस्थामा राखिएका छन्। भारतले ऊर्जा आपूर्तिमा कुनै समस्या नआओस् भन्ने उद्देश्यले सम्बन्धित देशहरूसँग निरन्तर समन्वय गरिरहेको उनले बताए।
यसअघि इन्धन बोकेर भारततर्फ आइरहेको एक थाई जहाजमाथि हमला भएको घटना सार्वजनिक भएपछि खाडी क्षेत्रको सुरक्षा अवस्थालाई लिएर चिन्ता बढेको थियो। सो घटनापछि भारतले आफ्नो ऊर्जा आपूर्ति सुरक्षित राख्न विशेष निगरानी र समन्वय बढाएको बताइएको छ।
