काठमाडौँ । नेपाली काँग्रेसका सभापति गगन थापालाई राजीनामा नदिन पार्टीका ३० भन्दा बढी केन्द्रीय सदस्यहरूले आग्रह गरेका छन्। पछिल्ला राजनीतिक घटनाक्रम र चुनावी परिणामपछि पार्टीभित्र विभिन्न चर्चा भइरहेका बेला नेताहरूले सभापतिलाई भेटेर यस्तो आग्रह गरेका हुन्।
शनिवार बिहान बालुवाटारस्थित निवासमा सभापति थापालाई भेट्न सहमहामन्त्री प्रकाश रसाइली ‘स्नेही’, केन्द्रीय सदस्य मधु आचार्य, अजयबाबु शिवाकोटी, प्रमोद गुरागाईँलगायत नेताहरू पुगेका थिए। भेटका क्रममा उनीहरूले सभापति थापालाई अहिलेको अवस्थामा राजीनामा नदिन आग्रह गरेका हुन्।
केन्द्रीय सदस्य अजयबाबु शिवाकोटीका अनुसार अहिलेको परिस्थितिमा सभापति थापाको राजीनामा समाधानको विकल्प नभएको नेताहरूको धारणा रहेको छ। उनले सभापतिले राजीनामा दिएर पार्टीभित्र देखिएको समस्या समाधान नहुने भन्दै अहिले त्यस्तो कदम नचाल्न आफूहरूले आग्रह गरेको बताए।
उनका अनुसार उक्त भेटघाटमा पछिल्ला समसामयिक राजनीतिक घटनाक्रम, हालै सम्पन्न निर्वाचनको समीक्षा, पार्टी संगठन सुदृढीकरण तथा आगामी रणनीतिका विषयमा पनि छलफल भएको थियो।
नेताहरूले पार्टीभित्र देखिएको चुनौतीलाई सामूहिक रूपमा सामना गर्नुपर्नेमा जोड दिँदै नेतृत्व परिवर्तनभन्दा पनि संगठन सुदृढीकरण र पार्टीलाई एकताबद्ध बनाउनेतर्फ ध्यान दिनुपर्ने धारणा राखेका छन्। उनीहरूले सभापति थापालाई संयमता अपनाउँदै सबै पक्षलाई समेटेर पार्टीलाई अघि बढाउन आग्रह गरेका छन्।
हाल नेपाली काँग्रेसभित्र चुनावी परिणाम र पार्टीको भावी रणनीतिबारे विभिन्न तहमा छलफल चलिरहेको छ। यस्तो अवस्थामा पार्टीका धेरै नेताहरूले सभापति थापाले नै नेतृत्व गर्दै संगठनलाई मजबुत बनाउँदै अघि बढ्नुपर्ने धारणा व्यक्त गरेका छन्।
