काठमाडौं । हाल नेपालमा पश्चिमी वायू तथा नेपालको पूर्वी भू–भाग नजिक तल्लो वायुमण्डलमा रहेको न्यून चापीय क्षेत्रको आंशिक प्रभाव रहेको छ।
मौसम पूर्वानुमान महाशाखाका अनुसार अहिले बागमती र गण्डकी प्रदेशका साथै कोशी प्रदेशको पहाडी तथा हिमाली भू–भागमा सामान्यतया बदली रहेको छ भने बाँकी प्रदेशका पहाडी र हिमाली भू–भागमा आंशिक बदली रहेको छ।
महाशाखाका अनुसार गण्डकी प्रदेशको पहाडी भू–भागका केही स्थान तथा बागमती प्रदेशको तराईका थोरै स्थानमा मेघगर्जन र चट्याङसहित मध्यम वर्षा भइरहेको छ।
आज दिउँसो कोशी र सुदूरपश्चिम प्रदेशका साथै अन्य प्रदेशका पहाडी र हिमाली भू–भागमा सामान्यतया बदली रहने तथा बाँकी भू–भागमा आंशिक बदली रहने सम्भावना रहेको महाशाखाले जनाएको छ।
कोशी, बागमती, गण्डकी र लुम्बिनी प्रदेशका पहाडी तथा हिमाली भू–भागका थोरै स्थानका साथै अन्य प्रदेशका हिमाली भू–भागमा मेघगर्जन तथा चट्याङसहित मध्यम वर्षा वा हिमपात हुने सम्भावना रहेको छ। साथै कोशी प्रदेशको तराई तथा कर्णाली र सुदूरपश्चिम प्रदेशका पहाडी भू–भागका एक–दुई स्थानमा पनि यस्तो मौसम हुने अनुमान गरिएको छ।
आज राति देशको हिमाली भू–भागमा सामान्यतया बदली रहनेछ भने बाँकी भू–भागमा आंशिक बदली रहने महाशाखाले जनाएको छ। महाशाखाका अनुसार हिमाली भू–भागका थोरै स्थान तथा पहाडी भू–भागका एक–दुई स्थानमा मेघगर्जन र चट्याङसहित मध्यम वर्षा वा हिमपात हुने सम्भावना रहेको छ।
