काठमाडौं । जल तथा मौसम पूर्वानुमान महाशाखा का अनुसार आज देशका अधिकांश प्रदेशमा आंशिकदेखि साधारणतया बदली रहने अनुमान गरिएको छ।
महाशाखाका अनुसार आज कोशी, मधेश, बागमती, गण्डकी र लुम्बिनी प्रदेशका साथै कर्णाली र सुदूरपश्चिम प्रदेशका पहाडी भागमा साधारणतया बादल लाग्नेछ भने अन्य भू–भागमा आंशिक बदली रहने सम्भावना रहेको छ।
त्यस्तै कोशी, बागमती र गण्डकी प्रदेशका पहाडी तथा हिमाली भागका केही स्थानहरूमा, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू–भागमा तथा मधेश प्रदेशका केही स्थानमा मेघगर्जन र चट्याङसहित हल्का वर्षा हुने सम्भावना रहेको महाशाखाले जनाएको छ। उच्च हिमाली क्षेत्रका केही स्थानमा हल्का हिमपात पनि हुन सक्ने अनुमान गरिएको छ।
आज राति पनि मौसम आंशिकदेखि साधारणतया बदली रहने अनुमान छ। कोशी प्रदेशलगायत देशका पहाडी क्षेत्रमा साधारणतया बादल लाग्नेछ भने बाँकी भागमा आंशिक बदली रहने महाशाखाले जनाएको छ।
यसैगरी रातिको समयमा कोशी प्रदेशका केही स्थान, बागमती र गण्डकी प्रदेशका पहाडी तथा हिमाली क्षेत्रका केही स्थान तथा कर्णाली र सुदूरपश्चिम प्रदेशका पहाडी र हिमाली भू–भागका एक–दुई स्थानमा मेघगर्जन र चट्याङसहित हल्का वर्षा वा हिमपातको सम्भावना रहेको जनाइएको छ।
मौसममा आउने सम्भावित परिवर्तनलाई ध्यानमा राख्दै आवश्यक सतर्कता अपनाउन महाशाखाले सर्वसाधारणलाई आग्रह गरेको छ।
