पोखरा । Pokhara Metropolitan City ले महानगरभित्रका किसानलाई छ टनभन्दा बढी मकैको बीउ ५० प्रतिशत अनुदानमा वितरण गरेको छ।
महानगरभित्र मकै खेतीप्रति किसानलाई आकर्षित गर्ने उद्देश्यले अनुदानमा बीउ वितरण गरिएको महानगरपालिकाको कृषि विकास शाखाका प्रमुख मनहर कडरियाले जानकारी दिए।
उनका अनुसार किसानलाई विभिन्न जातका मकैका बीउ उपलब्ध गराइएको छ। जसअन्तर्गत ‘रामपुर कम्पोजिट’ जातको १ हजार १०० किलो, ‘अरुण–२’ जातको ३ हजार १०० किलो र ‘मनकामना–३’ जातको २ हजार १० किलो बीउ वितरण गरिएको हो।
सामान्यतया प्रतिकिलो ११० रुपैयाँ पर्ने मकैको बीउ किसानलाई ५० प्रतिशत अनुदानमा उपलब्ध गराइएको कृषि विकास शाखाले जनाएको छ।
अनुदानमा बीउ वितरणका लागि महानगरपालिकाले सार्वजनिक सूचना जारी गरेपछि निवेदन दिएका ५०० भन्दा बढी किसानलाई बीउ वितरण गरिएको प्रमुख कडरियाले बताए।
महानगर क्षेत्रभित्र हाल करिब ६ हजार हेक्टर क्षेत्रफलमा मकै खेती हुँदै आएको छ। यस कार्यक्रमले उत्पादन वृद्धि गर्न र किसानलाई व्यावसायिक खेतीतर्फ आकर्षित गर्न सहयोग पुग्ने महानगरपालिकाको अपेक्षा छ।
