काठमाडौं । फागुन २१ गते हुने प्रतिनिधिसभा सदस्य निर्वाचनका लागि देशभरका १६५ निर्वाचन क्षेत्रमा दुई लाख २१ हजार कर्मचारी खटिने भएका छन्।
७७ जिल्लाका १६५ निर्वाचन क्षेत्रका २३ हजार ११२ स्थायी मतदान केन्द्र र समानुपातिक मत मात्र हाल्ने १४३ अस्थायी केन्द्रमा कर्मचारी खटाउने व्यवस्था गरिएको छ। आयोगका सहायक प्रवक्ता प्रकाश न्यौपानेका अनुसार पाँच सयभन्दा बढी मतदाता भएका केन्द्रमा नौ जना र ५०० भन्दा कम मतदाता भएका केन्द्रमा आठ जना कर्मचारी खटाइनेछ।
मतदान केन्द्रमा खटिने मतदान अधिकृत र सहायक मतदान अधिकृतलाई प्रशिक्षण दिइसकेपछि, अन्य कर्मचारीलाई मतदान अधिकृतले नै प्रशिक्षण दिने व्यवस्था मिलाइएको छ।
निर्वाचन सामग्री र मतपत्र बिहीबार देशभरका १६५ निर्वाचन क्षेत्रमा वितरण भइसकेको आयोगले जानकारी दिएको छ।
