काठमाडौं । आगामी प्रतिनिधिसभा निर्वाचनको तयारीसँगै नवलपरासी (बर्दघाट सुस्ता पश्चिम) जिल्ला प्रशासनले राजनीतिक दलका गतिविधिमाथि निगरानी बढाएको छ । यसै क्रममा प्रशासनले राष्ट्रिय स्वतन्त्र पार्टी (रास्वपा) का सभापति रवि लामिछाने सहभागी हुने कार्यक्रममा निर्वाचन आचारसंहिता उल्लङ्घन हुन सक्ने भन्दै सचेत गराएको छ ।
रास्वपाले आज जिल्लामा आयोजना गर्न लागेको ‘जनसम्पर्क तथा घण्टी अभिवादन कार्यक्रम’ लक्षित गर्दै प्रशासनले सूचना जारी गरेको हो । सो सूचनामा राजनीतिक दललाई निर्वाचन आचारसंहिताको सीमा भित्र रहेर मात्र कार्यक्रम सञ्चालन गर्न निर्देशन दिइएको छ ।
सहायक प्रमुख जिल्ला अधिकारी तथा निर्वाचन आचारसंहिता अनुगमन अधिकृत पोषन राज भण्डारीद्वारा हस्ताक्षरित पत्रमा प्रतिनिधि सभा सदस्यको आसन्न निर्वाचन निष्पक्ष, स्वतन्त्र र भयरहित वातावरणमा सम्पन्न गर्न प्रशासन प्रतिबद्ध रहेको उल्लेख गरिएको छ ।
निर्वाचन आयोगले गत माघ १४ गतेदेखि देशभर निर्वाचन आचारसंहिता २०८२ लागू गरिसकेको सन्दर्भमा राजनीतिक दलहरूलाई नियम पालना गराउन प्रशासन सक्रिय देखिएको छ ।
जारी सूचनामा भनिएको छ, “२०८२ साल माघ २७ गते यस जिल्लामा राष्ट्रिय स्वतन्त्र पार्टीका सभापति रवि लामिछानेको उपस्थितिमा हुने भनिएको कार्यक्रमबारे जानकारी प्राप्त भएको छ । सो कार्यक्रममा निर्वाचन आचारसंहिता २०८२ विपरीत हुने कुनै पनि गतिविधि नगर्न र नगराउन सम्बन्धित सबै पक्षलाई सूचित गरिन्छ।”
प्रशासनले आचारसंहिता उल्लङ्घन भए कानूनी कारबाही समेत हुन सक्ने चेतावनी दिएको छ । यस कदमले निर्वाचनअघि राजनीतिक दलहरूको गतिविधिमा पारदर्शिता र नियन्त्रण कायम गर्न प्रशासनको तयारी झल्काएको छ ।
