काठमाडौं । नेपाली चलचित्र जगतका एक वरिष्ठ कलाकार सुनिल थापा शनिबार बिहान निधन भएका छन्। ६८ वर्षीय थापा थापाथलीस्थित नर्भिक अस्पतालमा उपचारका क्रममा निधन भएको हो। बिहान एक्कासी स्वास्थ्यमा समस्या देखिएपछि उनलाई अस्पताल ल्याइएको थियो। अस्पतालका स्रोतका अनुसार, उनलाई बेहोस (अनकन्सियस) अवस्थामा अस्पताल पुर्याइएको थियो भने बिहान ७:४४ बजे ईसीजी गर्दा चिकित्सकले मृत घोषणा गरेका थिए। अस्पतालले उनको निधनको प्राथमिक कारण ‘कार्डियाक अरेस्ट’ (हृदयघात) भएको जनाएको छ।
वि.सं. २०१७ (सन् १९६०) मा दाङमा जन्मिएका थापा नेपाली चलचित्र इतिहासका त्यस्ता कलाकार हुन्, जसले खलनायक भूमिकालाई नयाँ उचाइ र पहिचान दिएका थिए। सन् १९८१ मा बलिउडको सुपरहिट चलचित्र ‘एक दुजे के लिए’ बाट आफ्नो अभिनय यात्रा सुरु गरेका उनले करिब चार दशक लामो करियरमा १०० भन्दा बढी नेपाली, हिन्दी र भोजपुरी चलचित्रमा अभिनय गरेका थिए।
विशेषगरी वि.सं. २०४८ सालमा रिलिज भएको चलचित्र ‘चिनो’ मा उनले निभाएको ‘राते काइँला’ को भूमिका यति शक्तिशाली थियो कि आज पनि दर्शकले उनलाई सोही नामबाट सम्झन्छन्। उनको ठूलो शरीर, गहिरो र रौद्र आवाज, प्रभावशाली अभिनय शैलीले उनलाई नेपाली सिनेमाको एक अपरिहार्य ‘ब्रान्ड’ बनाएको थियो।
थापा केवल कलाकार मात्र थिएनन्। उनी पूर्व खेलाडी, मोडेल र पत्रकार पनि थिए। सन् १९७० को दशकमा मुम्बईमा फुटबल र मोडलिङमा सक्रिय रहेका उनले ‘जेएस म्यागाजिन’का लागि फोटो पत्रकारको रूपमा काम गरेका थिए। सन् १९७४ मा भुटानका राजाको राज्याभिषेक समारोहलाई फोटो पत्रकारकै रूपमा कभर गरेका थिए।
बलिउडमा पनि आफ्नो कला देखाउँदै उनले सन् २०१४ मा रिलिज भएको चलचित्र ‘मेरी कोम’ मा प्रियंका चोपडाको गुरु (कोच) को भूमिका निर्वाह गरे। उक्त भूमिकाका लागि उनले प्रतिष्ठित फिल्मफेयर अवार्डमा सर्वश्रेष्ठ सहायक अभिनेताको मनोनयन प्राप्त गरेका थिए।
उनको अभिनय यात्रामा देश, दक्षिणा, बलिदान, बाटोमुनिको फूल, मुखौटा, क्याप्टेन जस्ता अविस्मरणीय चलचित्रहरू रहेका छन्। कला क्षेत्रमा पुर्याएको योगदान स्वरूप उनलाई दुई पटक मोसन पिक्चर्स अवार्ड र अन्तर्राष्ट्रिय स्तरमा फेस्टिभल अफ ग्लोब लाइफ टाइम एचिभमेन्ट अवार्ड बाट सम्मानित गरिएको थियो।
थापाको निधनले नेपाली चलचित्र क्षेत्रले एक प्रेरणादायी र मार्गदर्शक व्यक्तित्व गुमाएको छ। उनको परिवारमा श्रीमती राजनी लिम्बू थापा र दुई सन्तान रहेका छन्। नेपाली कला आकाशमा ‘राते काइँला’ को गर्जन र ओझिलो उपस्थिति सधैंका लागि शान्त भएको भए पनि, उनले छोडेर गएका जीवन्त पात्रहरू नेपाली चलचित्रको इतिहासमा अमर रहनेछन्।
हार्दिक श्रद्धाञ्जली सुनिल थापा !
