काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता तथा प्रधानमन्त्रीका उम्मेदवार बालेन्द्र शाह ‘बालेन’ झापा–५ अन्तर्गतको एक सुकुम्वासी बस्तीमा पुगेर स्थानीयसँग छलफल गरेका छन्।
मंगलबार भएको भेटघाटका क्रममा स्थानीय बासिन्दाले जग्गाधनी पूर्जा (लालपुर्जा) सम्बन्धी समस्या र गुनासो राखेका थिए। स्थानीयको कुरा सुनेपछि बालेनले सुकुम्वासी समस्यालाई मानवीय र कानुनी दुवै दृष्टिकोणबाट समाधान गर्नुपर्ने बताएका छन्।
उनले काठमाडौंका खोला किनारका जोखिमयुक्त बस्ती र झापाका पुराना बसोबास क्षेत्रको अवस्था फरक रहेको उल्लेख गर्दै वास्तविक सुकुम्वासीलाई अन्याय हुन नदिने प्रतिबद्धता व्यक्त गरे। सुकुम्वासीको नाममा राजनीति गर्ने प्रवृत्ति र पहुँचका आधारमा मात्र पूर्जा वितरण हुने अभ्यासको अन्त्य हुनुपर्नेमा पनि उनले जोड दिए।
नेता शाहले कसैलाई पनि विस्थापित गर्नु अघि वैकल्पिक सुरक्षित बसोबासको ग्यारेन्टी राज्यले गर्नुपर्ने धारणा राखे। आगामी दिनमा भूमि आयोगलाई निष्पक्ष बनाउँदै वास्तविक पीडितले मात्र लालपुर्जा पाउने व्यवस्था मिलाइने आश्वासन पनि उनले दिएका छन्।
