काठमाडौं । नेपाली बजारमा आइतबार पनि सुनचाँदीको मूल्य बढ्ने क्रम रोकिएको छैन। कारोबार हुने हप्ताको पहिलो दिन आइतबार सुन र चाँदी दुवैको मूल्य बढेर नयाँ कीर्तिमान कायम भएको हो।
नेपाल सुनचाँदी व्यवसायी महासंघका अनुसार आइतबार सुनको मूल्य तोलामा २ हजार ४ सय रुपैयाँले वृद्धि भई तोलाको ३ लाख ३ हजार ८ सय रुपैयाँ पुगेको छ। यसअघि शुक्रबार सुन तोलाको ३ लाख १ हजार ४ सय रुपैयाँ मा कारोबार भएको थियो।
विश्व अर्थतन्त्रमा बढ्दो अनिश्चितता, मुद्रास्फीति तथा भू–राजनीतिक तनावका कारण सुरक्षित लगानीका रूपमा सुन र चाँदीको माग बढेकाले मूल्य उकालो लागेको विश्लेषण गरिएको छ।
त्यसैगरी, चाँदीको मूल्य पनि आइतबार हालसम्मकै उच्च बिन्दुमा पुगेको छ। चाँदी तोलामा २ सय ९० रुपैयाँले बढेर ६ हजार ४ सय ८० रुपैयाँ मा कारोबार भइरहेको महासंघले जनाएको छ। शुक्रबार चाँदीको मूल्य तोलाको ६ हजार १ सय ९० रुपैयाँ थियो।
