काठमाडौँ । नेपाली कांग्रेसका नेता गोपालमान श्रेष्ठले पार्टी नेतृत्वले विशेष महाधिवेशनबाट भएका निर्णयहरू कार्यान्वयन गर्दै अघि बढ्नुपर्ने बताउनुभएको छ ।
महामन्त्रीद्वय गगन थापा र विश्वप्रकाश शर्माको नेतृत्वमा काठमाडौँको भृकुटीमण्डपमा जारी पार्टीको विशेष महाधिवेशनलाई सम्बोधन गर्दै नेता श्रेष्ठले यस्तो धारणा राख्नुभएको हो ।
उहाँले पार्टी नेतृत्वले हठ गरेर बस्न नमिल्ने उल्लेख गर्दै पार्टी विधि र विधानअनुसार चल्न नसकेको आरोप लगाउनुभयो । साथै, पार्टीको नेतृत्व युवा पुस्तालाई हस्तान्तरण गर्नुपर्ने आवश्यकता पनि औँल्याउनुभयो ।
नेता श्रेष्ठले भन्नुभयो, ‘यहाँ कसैले हठ गरेर बस्नु हुँदैन । विधि र विधानअनुसार अगाडि बढ्न दिनुपर्छ । विशेष महाधिवेशनले गरेको निर्णयलाई कार्यान्वयन गर्नुपर्छ भन्ने मेरो मान्यता छ ।’
उहाँले मुलुक जोगाउन पार्टीका नेता तथा कार्यकर्ताहरूलाई एकतावद्ध भएर अघि बढ्न आग्रह गर्नुभएको छ ।
