काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माको अगुवाइमा आयोजना हुन लागेको ‘विशेष महाधिवेशन’ विरुद्ध सुदूरपश्चिमका जिल्ला नेतृत्वले कडा असन्तुष्टि जनाएका छन् । प्रदेशका ६ जिल्ला सभापतिहरूले शुक्रबार एक संयुक्त विज्ञप्ति जारी गर्दै प्रस्तावित महाधिवेशन पार्टी विधानको मर्मविपरीत रहेको ठहर गरेका हुन् ।
काठमाडौंको भृकुटीमण्डपमा यही पुस २७ र २८ गतेका लागि तय गरिएको विशेष महाधिवेशनको तयारी अन्तिम चरणमा पुग्दा सुदूरपश्चिमका प्रभावशाली जिल्ला सभापतिहरूले भने त्यसलाई बहिष्कार गर्न आम कार्यकर्तालाई अपिल गरेका छन् ।
विशेष महाधिवेशनविरुद्ध संयुक्त हस्ताक्षर गर्नेहरूमा कैलाली सभापति नारायणदत्त भट्ट, कञ्चनपुरका पदम बोगटी, अछामका पुष्पबहादुर शाह, डडेलधुराका भीम साउँद, डोटीका नरेन्द्रबहादुर सिंह र बझाङका खडकबहादुर बोहरा रहेका छन् । उनीहरूले विशेष महाधिवेशनको सट्टा नियमित महाधिवेशनकै प्रक्रियामा जानुपर्ने अडान राखेका छन् ।
ती सभापतिहरूले पार्टीको विधानलाई उद्धृत गर्दै केन्द्रीय कार्यसमितिको निर्णयविना कुनै पनि पदाधिकारी वा व्यक्तिले एकलौटी रूपमा अधिवेशन वा विशेष अधिवेशन बोलाउन नपाउने जिकिर गरेका छन् । विज्ञप्तिमा भनिएको छ, ‘पदाधिकारी वा सदस्यले व्यक्तिगत रूपमा बोलाएको अधिवेशनका नाममा गरिने कुनै पनि गतिविधि पार्टीको विधानविपरीत हुन्छ । तसर्थ, यस्ता अवैधानिक गतिविधिमा संलग्न नहुन पार्टीका सबै तहका पदाधिकारी, सदस्य, महासमिति सदस्य, महाधिवेशन प्रतिनिधि तथा भातृ एवं शुभेच्छुक संस्थाका प्रतिनिधिलाई हार्दिक अपिल गर्दछौं ।’
जिल्ला सभापतिहरूले पार्टीभित्रको गुटबन्दी र विशेष महाधिवेशनको रस्साकस्सी छोडेर आगामी निर्वाचनमा केन्द्रित हुन नेतृत्वलाई सुझाएका छन् । उनीहरूले माघ ११ गते हुने राष्ट्रिय सभा निर्वाचन र फागुन २१ गते हुने प्रतिनिधि सभा निर्वाचनमा पार्टीलाई एकताबद्ध बनाएर लैजानुपर्नेमा जोड दिएका छन् ।
यता, महामन्त्रीद्वय थापा र शर्मा पक्षले भने महाधिवेशन प्रतिनिधिहरूको व्यापक माग र हस्ताक्षरका आधारमा विशेष महाधिवेशन बोलाइएको भन्दै यसलाई विधानसम्मत रहेको दाबी गर्दै आएका छन् । तर, सुदूरपश्चिमको यो सामूहिक विज्ञप्तिले कांग्रेसभित्रको आन्तरिक ध्रुवीकरणलाई थप सतहमा ल्याइदिएको छ ।
