काठमाडौं । मुलुक निर्वाचनको संघारमा उभिएका बेला प्रधानमन्त्री सुशीला कार्कीले ‘राष्ट्र, राष्ट्रियता, धर्म, संस्कृति तथा नागरिक बचाऊ अभियान’ का संयोजक दुर्गा प्रसाईँसँग अर्थपूर्ण संवाद गरेकी छन् । मंगलबार बिहान प्रधानमन्त्री निवास बालुवाटारमा भएको भेटमा प्रधानमन्त्री कार्कीले प्रसाईँलाई सडक सङ्घर्षको साटो जनमत (चुनाव) मार्फत आफ्ना एजेन्डा स्थापित गर्न सुझाव दिइन् ।
भेटका क्रममा प्रधानमन्त्रीले मुलुकले अब कुनै पनि प्रकारको अस्थिरता र द्वन्द्व थेग्न नसक्ने स्पष्ट पारिन् । दिगो लोकतन्त्र र शान्तिका लागि निर्वाचन नै अन्तिम र सर्वोत्तम विकल्प भएको उल्लेख गर्दै उनले प्रसाईँलाई जिम्मेवार भूमिका निर्वाह गर्न आग्रह गरिन् ।
हिन्दु राष्ट्र पुन:स्थापना लगायतका माग राख्दै आएका प्रसाईँलाई प्रधानमन्त्रीको स्पष्ट सन्देश थियो- ‘जनताको अदालतमा जानुस् ।’ लोकतान्त्रिक विधिबाट जनताले अनुमोदन गरे मात्रै कुनै पनि मुद्दा संस्थागत हुने भन्दै उनले निर्वाचनको अवसरलाई उपयोग गर्न प्रसाईँलाई सुझाइन् । ‘ठुलो सङ्घर्ष र सकसपछि हामीले मुलुकलाई शान्तिको मार्गमा ल्याएका छौँ,’ प्रधानमन्त्री कार्कीले भनिन्, ‘अहिले मुलुक निर्वाचनमय भइसकेको छ । यस्तो संवेदनशील घडीमा यो देश मेरो पनि हो भन्ने भावना राखेर सबै पक्ष जिम्मेवार बन्नुपर्छ ।’
संवादका क्रममा शान्ति र अमनचैनको सन्देश दिन प्रधानमन्त्री कार्कीले प्रसाईँलाई शान्तिका अग्रदूत भगवान् गौतम बुद्धको तस्बिर उपहारस्वरूप प्रदान गरिन् । सरकार सत्ता र शक्तिको भोग विलासका लागि नभई न्याय र सुशासनका लागि प्रतिबद्ध रहेको प्रधानमन्त्रीको भनाइ थियो । उनले आफूहरू न्यायको पक्षधर भएको बताउँदै भनिन्, ‘हामीले भ्रष्टाचार नियन्त्रण र शोषित-पीडितलाई न्याय दिलाउने आधारशीला तयार पार्दैछौँ । सबै नतिजा रातारात नदेखिएला, तर इमानदार प्रयास जारी छ ।
