रामेछाप । रामेछाप कारागारमा बिहीबार बिहान ठूलो झडप भएको छ । कैदीबन्दीहरू भाग्ने प्रयास गरेपछि त्यहाँ खटिएको नेपाली सेनाले गोली चलाउन बाध्य भएको प्रहरीले जनाएको छ ।
कारागार प्रशासनका अनुसार करिब दुई दर्जन कैदीले मुख्य गेट र पर्खाल तोडफोड गर्दै भाग्ने प्रयास गरेका थिए । स्थिति नियन्त्रणमा लिन सुरक्षाकर्मीले लाठी प्रहार र चेतावनी स्वरूप हवाइ फायर गरे पनि भीड नथामिएपछि सेनाले सीधा गोली चलाएको हो । गोली चलेको डिएसपी भोलकुमार भट्टले पुष्टि गरे । ‘हामी यही छौँ, गोली चलेको हो ।’
घटनामा करिब १५ जना कैदी घाइते भएका छन् । उनीहरूलाई जिल्ला अस्पताल रामेछापमा उपचारका लागि लगिएको छ । केहीको अवस्था गम्भीर रहेको बताइएको छ ।
कारागार प्रशासनले यस घटनापछि सुरक्षा कडा बनाइएको र अन्य कैदीलाई अलग–अलग कोठामा राखी निगरानी बढाइएको जनाएको छ ।
स्थानीयवासीले गोली चलेपछि केही समय आसपास त्रास फैलिएको तर अहिले स्थिति नियन्त्रणमा आएको बताएका छन् ।
यस विषयमा थप छानबिन भइरहेको जिल्ला प्रहरी कार्यालय रामेछापले जानकारी दिएको छ ।
रामेछाप डाँडा स्थित कारागारमा रहेका कैदिहरुले गेट तोडेर भाग्ने प्रयास गरेपछि नेपाली सेनाले गोली चलाएको प्रमुख जिल्ला अधिकारी श्यामकृष्ण थापाले बताए । अहिले स्थिति सामान्य बन्दै गएको (प्रजिअ) थापाको भनाई रहेको छ ।
